Бишкек, 24.12.18. /Кабар/. Ысык-Көл облусунун Жети-Өгүз районунда 1,5 жаштагы ымыркай ур-токмоктон көз жумган. Бул тууралуу “Кабар” агенттигине облустук милиция бөлүмүнүн басма сөз кызматынан кабарлашкан.
Маалыматка ылайык, 23-декабрь күнү Жети-Өгүз районунун милиция кызматына райондук ооруканадан денесинде көп ур-токмоктун издери бар ымыркай келип түшкөндүгү тууралуу маалымат берилген.
Бала кайра жандандыруу бөлүмүнө киргизилип, ал жактан эсине келбей көз жумган.
Ымыркайдын энеси Светлая Поляна айылынын тургуну 21 жаштагы аял 2016-жылы жолдошу менен ажырашып, декабрь айынын башында Россияга иштеп кеткен. Уулун төрт баласы бар бир тууган эжесине калтырган.
Баланы карап жаткан тай эжесинин айтуусунда, 23-декабрь күнү бала шымына сийип койгон. Эжеси жини келип баланы таяк менен уруп, эки-үч жолу чымчып коюп, уктатып койгон.
“Эки сааттан кийин ал баланы караса, бала кыйналып жатканын көрүп, тез жардам чакырган. Бала ооруканадан кайра жандандыруу бөлүмүнө киргизилген. Баланын денесинде абдан көп ур-токмоктун издери бар. Андан тышкары анын желкесинде жаракаты бар”, - деп кабарлашты милиция кызматынан.
Учурда кылмыш иши козголуп, баардык тийиштүү экспертизалар дайындалган.
Шектүү аял учурда убактылуу кармоо жайына киргизилген. Тергөө жүрүүдө.
Пикир
Оставить комментарий