Бишкек, 03.05.24. /Кабар/. Ысык-Көл районунда өтө турган эл аралык марафонго байланыштуу унаалардын каттамына чектөөлөр киргизилет. Бул тууралуу ИИМдин басма сөз кызматы кабарлады.
Маалыматта айтылгандай, 4-майда Ысык-Көл районунун Бактуу-Долоноту айылында жайгашкан ат майдандан тартып, Корумду айылынын күн чыгыш тарабындагы "Солемар" эс алуу жайынынын бурулушуна чейин чет элдик делегациялардын катышуусунда “Run the Silk Road – Shanghai Cooperation” эл аралык марафону өткөрүлөт.
Бул учурда Чолпон-Ата шаары аркылуу өтүүчү Балыкчы — Ананьево — Каракол автоунаа жолу маал-маалы менен убактылуу жабылып, автоунаалардын каттамына чектөөлөр киргизилет.
Иш-чаранын жагдайына байланыштуу айрым учурларда бул аталган автоунаа жолу 4 сааттан, 5 саатка чейин убактылуу жабылышы божомолдонууда.
Ошол себептен, облустун тургундары жана меймандары - жолдо жүрүүдө ар кандай ыңгайсыздактарды алдын алып, облус аралык алыскы жолго чыккан жүргүнчү ташуучу автобус, кичи автобустарга, жүргүнчү ташуучу жеке таксилерге жана башка автоунааларга Ысык-Көлдүн түндүк тарабы, тагыраагы Жети-Өгүз жана Тоң райондору аркылуу жол жүрүү сунушталат.
"Иш-чаранын уюштуруучулары, жалпы жол кыймылынын катышуучуларынан өтүп жаткан эл аралык иш-чарага байланыштуу болуп жаткан ыңгайсыздыктарды туура түшүнүү менен кабыл алууну суранат", - деп айтылат маалыматта.
Пикир
Оставить комментарий