Бишкек, 29.10.17 /Кабар/. «Өзбектелеком» жакында Telegram, Skype, Viber жана WhatsApp мессенджерлеринин аналогу болчу Uzphone тиркемесин ишке киргизүүнү пландап жатат. Бул тууралуу жергиликтүү маалымат каражаттары кабарлашты.
Учурда Uzphone тестирлөөдөн өтүүдө. Азыр ал аркылуу тексттик билдирүүлөрдү жөнөтүп, өз ара чалышууга мүмкүн.
«Азырынча ал кеңири аудиторияга жеткиликтүү эмес. Эки айдын ичинде бета-тестирлөө баскычына чыгабыз. Кийинки жылы расмий түрдө коомчулукка чыгарабыз», – деп билдирди «Өзбектелеком» компаниясынын өкүлчүлүгүнүн директору Марат Фаттахов.
Анын айтымында, дүйнөгө белгилүү тиркемелердин жергиликтүү вариантын иштеп чыгуу зарылдыгы чет өлкөлүк компаниялар Өзбекстанда таап жаткан кирешелердин бир бөлүгүн алуу, ошондой эле колдонуучуларга чет өлкөлүк аналогдорундай көп траффик талап кылбаган мессенджер сунуштоо сыяктуу бир нече фактор менен шартталган.
Болжол менен бир жылдан кийин тиркемени смарт-телевизорлор жана көзөмөл камералар менен интеграциялоо пландалууда. «Өзбектелекомдон» билдиришкендей, компаниянын техникалык мүмкүнчүлүктөрү аталган тиркемени жүктөп алган 1 миллиондон ашык колдонуучуну тейлөөгө шарт түзөт.
Буга чейин Өзбекстанда «Одноклассники» жана «Фейсбуктун» аналогу катары жергиликтүү социалдык түйүндөр ишке киргизилген. Бирок алар өзбекстандыктардын арасында тиешелүү деңгээлде популярдуулукка ээ боло алышкан жок.
Пикир
Оставить комментарий