Бишкек, 16.03.22. /Кабар/. Өзбекстанда Оксана Чусовитинанын спорттук гимнастика боюнча чеберчилик мектеби ачылат. Тиешелүү жарлыкка өлкө президенти Шавкат Мирзиёев 14-мартта кол койду.
Документке ылайык, мектеп Спорт министрлигинин системасында түзүлөт. Максаты – талантуу спортчуларды даярдоо жана Олимпиада оюндары менен жергиликтүү мелдештердеги жетишкендиктерди пропагандалоо.
Гимнастика мектеби юридикалык макамга ээ мамлекеттик спорттук-билим берүү мекемеси болуп эсептелет. Ал ишмердүүлүгүн 2022-2023-окуу жылында баштап, 1-11-класстарга окуучуларды кабыл алат деп пландалууда.
Президенттин жарлыгы менен тиешелүү министрликтерге 1-августка чейин заманбап гимнастика мектебин түзүү жана аны жабдуу тапшырмасы берилди.
Оксана Чусовитина — жети жолу жайкы Олимпиада оюндарына катышкан дүйнөдөгү жалгыз гимнастка.
Пикир
Оставить комментарий