Жайда «Ысык-Көл» аэропортунан кайсы өлкөлөргө жана шаарларга учууга болот? Тизме

Бишкек, 07.07.22. /Кабар/. «Манас» эл аралык аэропортунун басма сөз кызматы быйылкы жай мезгилинде «Ысык-Көл» эл аралык аэропортунан кайсы өлкөлөргө жана шаарларга учууга болору тууралуу маалымат берди.

Казакстан:

Алматы-Тамчы-Алматы багыты боюнча каттамдарды «SCAT» авиакомпаниясы дүйшөмбү жана жума күндөрү аткарат. 15-июлдан тарта 3 каттамга көбөйтүүнү пландаштырууда (шейшемби, шаршемби жана бейшемби күндөрү).

Россия:

Москва-Тамчы-Москва багыты боюнча каттамдарды «Аэрофлот» авиакомпаниясы бейшемби жана ишемби күндөрү аткарат. 10 июлдан тарта 2 каттамга көбөйтүлөт (шейшемби жана жекшемби күндөрү).

Москва-Тамчы-Москва багыты боюнча учуулар “Урал аба жолдору” авиакомпаниясы аркылуу күн сайын аткарылат.

Новосибирск-Тамчы-Новосибирск багыты боюнча учуулар «Сибирь» авиакомпаниясы аркылуу жекшемби күндөрү аткарылат.

Ички каттамдар:

Ош-Тамчы-Ош багыты боюнча учуулар «Тез Жет» авиакомпаниясы аркылуу шейшемби, шаршемби, бейшемби, жума, жекшемби күндөрү аткарылат.