Бишкек, 15.12.21. /Кабар/. Жалал-Абад шаарында элдин жашоо-шартын аныктоо үчүн үймө-үй кыдыруу өнөктүгү башталды. Бул тууралуу шаардык мэриянын басма сөз кызматы билдирет.
Маалыматка ылайык, иш-чаранын алкагында шаардын аймактык башкармалыктары, шаардык социалдык өнүктүрүү башкармалыгы менен биргеликте калаадагы үйлөрдү кыдырып чыгышат. Ал аркылуу үй-бүлөлүк зордук-зомбулукка жана турмуштун оор кырдаалына кабылган, мектепке тартылбай калган балдар аныкталат.
Андан тышкары, туулгандыгы тууралуу күбөлүгү жок же ата-энеси миграцияда жүргөн, аз камсыз болгон үй-бүлөлөр жөнүндө да маалымат чогултулат. Ошондой эле мүмкүнчүлүгү чектелген жарандар жана кароосуз карыялардын абалына анализ жүргүзүлөт.
Үймө-үй кыдыруу өнөктүгү бир жумага созулат.
Пикир
Оставить комментарий