Бишкек, 18.10.17 /Кабар/. Жалал-Абад шаарында жакыр үй-бүлөлөрдүн саны 476га кыскарды. Башкача айтканда, өткөн жылдын тогуз айында жакыр үй-бүлөлөрдүн саны 3840 болсо, быйылкы тогуз айда алардын санын 3364 үй-бүлө түздү. Бул өткөн жылдын тогуз айы менен салыштырганда 1,5 пайызга төмөндөөнү билдирет. Бул тууралу Жалал-Абад шаардык социалдык өнүгүү башкармалыгынын жетекчиси Айнура Асанова билдирди.
Анын айтымында, аталган башкармалык аз камсыз болгон үй-бүлөлөрдүн ишке жарамдуу атуулдарына жумуш табууга көмөктөшүп жатат. Ошол аркылуу ал үй-бүлөлөрдө жакырчылыктын деңгээли төмөндөөгө тийиш. Бул үчүн бош жумуш орундарына шаар боюнча жармаңкелер уюштурулуп турат.
"Ал эми бизде каттоодо турган аз камсыз болгон, жашы улгайган адамдарга жөлөк пулдарын таркатуу менен чектелип калбайбыз. Андан сырткары биздин кызматкерлер күнүмдүк тиричиликке керектүү азыктарын алып барып берип турушат. Маалыма болгондой, көпчүлүк атуулдарыбыз чет жактарга барып иштеп, өздөрүнүн жашоо шарттарын жакшыртышууда. Биз алардын чет жакта эмгектенүүсүнүн мыйзамдуулугуна да көмөктөшөбүз", - дейт А. Асанова.
Пикир
Оставить комментарий