Бишкек, 06.07.23. /Кабар/. Тышкы иштер министри Жээнбек Кулубаев Бириккен Улуттар Уюмунун Өнүктүрүү программасынын (БУУӨП) Кыргызстандагы туруктуу өкүлү Луиз Чемберленди миссиясынын аяктагандыгына байланыштуу кабыл алды. Бул тууралуу ТИМден кабарлашты.
Маалыматка ылайык, Жээнбек Кулубаев Луиз Чемберлен туруктуу өкүл катары Кыргызстандын БУУӨП менен өз ара аракеттенүүсүн бекемдөөгө салым кошконун, туруктуу өнүктүрүү, адам укуктарын коргоо, гендердик теңчилик, демократиялык институттарды өнүктүрүү, мыйзам үстөмдүгүн бекемдөө, саламаттык сактоо, азык-түлүк коопсуздугу, климаттын өзгөрүшүнө көнүү маселелери боюнча конструктивдүү кызматташууну камсыз кылганын белгиледи.
Министр БУУӨПкө өлкөнүн социалдык-экономикалык өнүгүүсүн камсыз кылууда, өзгөчө COVID-19 пандемиясында жана 2020-жылдын октябрындагы саясий кризистен кийин, ошондой эле каргашалуу Баткен окуяларында көрсөткөн жардамы үчүн ыраазычылык билдирди.
Туруктуу өкүл Чемберлен Кыргызстандагы миссиясын кыскача жыйынтыктап, анын ишмердүүлүгү Кыргызстандын өкмөтүнө, мамлекеттик органдарга жана өлкөнүн калкына, өзгөчө ар кандай чакырыктар жана көйгөйлөрдүн татаал мезгилинде колдоо көрсөтүүгө багытталганын белгиледи. Ал Кыргызстандагы бардык өнөктөштөргө, өзгөчө Тышкы иштер министрлигине БУУӨПтүн өлкөдөгү ишмердүүлүгүнө дайыма колдоо көрсөткөндүгү үчүн ыраазычылык билдирди.
Жолугушуунун соңунда Жээнбек Кулубаев Луиз Чемберленге өз ара пайдалуу кызматташтык үчүн ыраазычылык билдирип, кесиптик ишмердигине мындан аркы ийгиликтерди каалады.
Пикир
Оставить комментарий