Бишкек, 18.03.20. /Кабар/. Кыргыз Республикасынын Президенти Сооронбай Жээнбеков бүгүн, 18-мартта кыргызстандыктарга кайрылуу жасады. Бул тууралуу президенттин аппаратынын маалыматтык саясат бөлүмү билдирет.
Төмөндө Мамлекет башчысынын кайрылуусунун толук тексти:
«Урматтуу мекендештерим!
Дүйнөлүк коомчулук менен бирге, биз дагы коронавируска каршы күрөшүү үчүн орчундуу сыноого туш келдик.
Тилекке каршы, биздин өлкөбүздө да, бул илдетти жуктурган адамдар аныкталды.
Мындай кырдаалда мамлекеттин эң башкы милдети — жалпы элибиздин саламаттыгын сактоо.
Азыркы учурда өлкөдөгү медициналык кырдаал толук бойдон көзөмөлдө турат.
Дарыгерлерибиз тиешелүү даярдыктан өткөн, бул илдеттен кандай дарылоо керектигин билишет.
Учурда мамлекеттик органдардын, жергиликтүү бийликтин жана элдин чогуу аракети талап кылынат.
Мен баарыңыздарды тартипти катуу сактоого чакырам.
Бүгүн жалпы коомдун саламаттыгы үчүн ар бир жаран, ар бир ата-эне жооптуу.
Ар бир үй-бүлө өздүк гигиенанын талаптарын толук аткарышы абзел.
Зарылдыгы жок болсо, үйдөн чыкпай, башкалар менен жолугууну максималдуу кыскартуу зарыл.
Оорунун биринчи белгилери пайда болгон учурда, алгач эч жакка барбастан, телефон аркылуу врачка кайрылуу керек.
Чет өлкөдөн келген ар бир жаран обсервациянын жана үй карантиндин шарттарын кынтыксыз сактоого милдеттүү.
Айрым адамдардын бул талаптардын чегинен чыгуу аракеттерине кескин түрдө бөгөт коюлат.
Ар кандай жыйындарды, оюн-зоок иштерди, тойлорду, мааракелерди токтотуп туруу зарыл.
Мектептерде окутуу убактылуу токтотулду. Жогорку окуу жайлары аралыктан окутууга өткөрүлдү.
Чек аралар, өткөрүү пункттары, аэропорттор катуу кайтарылган тартип менен иштеп жатат.
Коомдук тартипти сактоо, өлкөнүн аймагына кирип-чыгуу иштери күчөтүлгөн тартипке которулду.
Урматтуу мекендештерим!
Азык-түлүктүн, дары-дармектин жана медициналык буюмдардын запасы жетиштүү.
Бул товарлар менен калкты туруктуу камсыз кылуу үчүн мамлекеттик органдар жана жергиликтүү бийлик тынымсыз иштеп жатат. Кооптонууга себеп жок.
Бүгүнкү кырдаалга өтө жоопкерчилик менен мамиле кылуу керек.
Дүрбөлөң салууга, коомдун тынчтыгын бузууга аракет кылгандар, чайкоочулук кылам дегендер, тамак-аштын жана дары-дармектин баасын негизсиз көтөргөндөр көз жаздымда калбайт.
Тиешелүү жоопкерчилигин тартат.
Азыр ар бир мекендешибиз өз кызыкчылыгын көздөбөй, „элибиз аман болсун, эл арасында мен аман болоюн“ деген түшүнүктү бекем кармануусу зарыл.
Урматтуу мекендештерим!
Бул илдетти биргелешип гана жеңе алабыз.
Баарыбыз тең аракетибизди бир максатка бириктирип, белгиленген шарттарды так аткаруубуз абзел.
Ар бир адам жарандык жоопкерчиликти сезип, өзүнүн туура жүрүм-туруму аркылуу бул күрөшкө салым кошкондо гана ийгиликке жетебиз!
Бир билек болуп түрүлүп, бир муштум болуп түйүлүп, бирге аракет кылууну талап кылган сыноо келди. Ата-бабаларыбыз сабырдуулук менен нечен кыйынчылыктарды жеңип келген. Кудай буйруса, бул сыноодон да адамдык сапатыбызга, улуттук ар намысыбызга шек келтирбей, абийирдүүлүк менен өтөбүз.
Жараткан Кудайым Өзү колдоп, элибизде аманчылык, жергебизде тынчтык болсун!».
Пикир
Оставить комментарий