Бишкек, 03.03.21. /Кабар/. Бириккен Улуттар Уюмунун өнүктүрүү программасынын (БУУӨП) жана Япония өкмөтүнүн колдоосу менен Борбордук шайлоо комиссиясы жана Мамлекеттик каттоо кызматы (МКК) шайлоочулардын тизмесинин инклюзивдүүлүгүн жогорулатуу боюнча ири өнөктүк өткөрүүдө.
БШКнын маалыматына караганда, маалыматтык автобустардын иши Чүй облусунда жайгашкан Кант шаарында көрсөтүлдү. Автобустар биометрикалык каттоо, паспорт алмаштыруу, туруктуу дарек каттоосу, электрондук санарип ачкычтарын берүү жана алдыдагы жергиликтүү кеңештерге шайлоого байланыштуу маалыматтарды берүү боюнча кызматтарды көрсөтүүнү максат кылышууда.
Иш-чарага Кыргыз Республикасынын Шайлоо жана референдум өткөрүү боюнча борбордук комиссиясынын төрайымы Нуржан Шайлдабекова, мамлекеттик каттоо кызматынын төрагасынын орун басары Айнура Туйбаева, Кыргыз Республикасындагы Япониянын элчилигинен Минори Симидзу жана УУӨПтүн Кыргыз Республикасындагы Туруктуу өкүлү Луиза Чемберлен катышты.
БШКнын төрайымы Нуржан Шайлдабекова жолугушууну ачып, "Шайлоочулар өздөрүн "Тизме" порталында өз дарегин жана фамилиясын киргизип, тизмеден бар-жок экенин тактап алса болот,, өз участогун да аныктаганга мүмкүнчүлүк бар. Ошондой эле 119 номерине пин-номери менен жазып, сиздин шайлоо участогунун номери жана дареги жөнүндө маалымат алууга болот. БШК МКК менен биргеликте бардык аймактарга 11 автобус жөнөттү. Эки автобус Чүй облусундагы чыгыш жана батыш багыттарына карай жөнөгөн. Автобус Ысык-Ата районунда 3-6-март күндөрү калкты тейлейт. Ысык-Ата району боюнча биометриканы 5 миң 335 адам тапшырган эмес жана аталган райондук администрациянын сунушу боюнча кайрылуулар келип түшкөн айылдар белгиленген.
МКК төрагасынын орун басары Айнура Туйбаева өз сөзүндө "Мамлекеттик каттоо кызматына БУУӨП Япония Өкмөтүнүн жардамы менен 2018-жылы 16 микроавтобус берген. Бүгүнкү күнү акысыз негизде мобилдик бустар карылар үйүндө жашаган жарандарга, УАС ардагерлерине, ошондой эле жетим балдарга жана балдар үйүнүн тарбиялануучуларына барып документ кабыл алууга көмөктөшүшөт. Ушул кеэири масштабдуу кампания өлкөбүздүн жаранына өзүнүн каттоо жана шайлоочулук укуктарын ишке ашырууга жардам берээрин күтүүдөбүз”, - деди.
Япониянын элчилигинин Атташеси Минори Симидзу катышуучуларга Япониянын элчиси Шигеки Маеданын атынан кайрылып, төмөнкүлөрдү кошумчалады: "Япония Өкмөтү 2015-жылдан бери БУУӨП менен биргеликте Кыргыз Республикасында ачык-айкын жана таза шайлоону өткөрүүнү колдоп келет. Тактап айтканда, эки парламенттик шайлоого, эки президенттик шайлоого жана андан кийинки шайлоолорго Япония Өкмөтү негизинен шайлоочуларды каттоо жана идентификациялоо тутумуна керектүү электрондук жабдууларды сатып алууга 11 миллион доллардан ашык каражат бөлүп берди. Бүгүн биз колдогон тутум ар бир шайлоодо натыйжалуу колдонулуп жаткандыгына кубанып турам. Ачык-айкын жана таза шайлоо демократиянын негизи болуп саналат жана Япония Кыргыз Республикасынын демократияны бекемдөө аракеттерин колдоону улантат".
Жыйынтыктап айтканда, БУУӨПтүн Кыргыз Республикасындагы Туруктуу өкүлү Луиз Чемберле төмөнкүлөргө токтолду: "Толугу менен демократиялык шайлоо бүткүл калкты камтыйт, анын ичинде алыскы аймактарда жашаган же башка себептерден улам каттоодон өтүүдө кыйынчылыктары бар элдер. Бул чара менен БУУӨП өлкөнүн кызыкдар тараптардын алыскы жерлерде жайгашкан шайлоочуларга жетүүгө жана алардын каттоодон өтүп, шайлоого натыйжалуу катышууга мүмкүнчүлүгү бар экендигин колдойт. БШКнын, МККнын жана жергиликтүү бийлик органдарынын муну ишке ашыруу үчүн тыгыз кызматташып, шайлоочулардын добуш берүүсүн жеңилдетүү боюнча иш алып барып жаткандыгына биз абдан кубанычтабыз".
Жакында шайлоочуларды автобустар менен мобилдик биометрикалык каттоодон өткөрүү өнөктүгү башталды, анын максаты калкка төмөнкү кызматтарды көрсөтүү, анын ичинде биометрикалык маалыматтарды каттоо, паспортторду алмаштыруу, туруктуу жашаган жерине катталуу, электрондук санарип колтамга алуу. Керектүү шаймандар жана адистер менен жабдылган 11 автобус 2021-жылдын 1-март айынан 20-март айына чейин өлкөнүн 130 шаарына жана айылдарына барат деп күтүлүүдө.
Жарандар үгүт өнөктүгү жана жергиликтүү кеңештерге шайлоолор жөнүндө Чакыруу борбору аркылуу 1255 телефону аркылуу биле алышат. Автобустардын жадыбалы бул жерде.
Пикир
Оставить комментарий