Бишкек, 16.09.24. /Кабар/. Жети-Өгүз районунда 9 жаштагы кызды зордуктоого шектелгендер кармалып, камакка алынды. Бул тууралуу Ички иштер министрлигинен билдиришти.
Маалыматка ылайык, 9-сентябрда Жети-Өгүз райондук ички иштер бөлүмүнө 9 жаштагы кызды эки адам зордуктаганы тууралуу арыз түшкөн.
Факт Жети-Өгүз РИИБде катталып, КР Кылмыш-жаза кодексинин 154-беренеси ("Зордуктоо") менен кылмыш иши козголгон.
Бул окуя ички иштер министринин көзөмөлүнө алынып, бардык зарыл болгон тергөө иштерин жүргүзүү тапшырылган.
Жүргүзүлгөн ыкчам-тергөө иш-чараларынын жүрүшүндө Жети-Өгүз РИИБдин кызматкерлери тарабынан шектүү адамдар кармалган. Алар ушул эле райондун 2005-жылы туулган Э.Э. жана 1999-жылы туулган О. А. аттуу тургундары болуп чыккан.
Жети-Өгүз райондук сотунун чечими менен кармалгандар 2 айга камакка алынып, тергөө абагына киргизилди. Кылмыш иши боюнча тергөө иштери уланууда.
ИИМ жетекчилиги мындай фактылар көңүл сыртында калбай турганын жана күнөөлүүлөр КР мыйзамына ылайык катуу жазага тартыларын эскертет.
Пикир
Оставить комментарий