Жолугушууда мурдагы президенттерди өлкөгө кайтарып келүү жөнүндө сөз айтылган жок — Орунбеков

Бишкек, 20.02.23. /Кабар/. Президенттин администрациясынын маалыматтык саясат кызматынын жетекчиси Дайырбек Орунбеков Садыр Жапаров менен Кыргызстандын мурдагы президенттеринин жолугушуусу тууралуу пикир калтырды.

“Президент Садыр Жапаров мурдагы президенттер менен болгон жолугушуусу тууралуу жазган билдирүүсүнөн кийин, социалдык тармакта талкуулар жаралды. Мындай күтүүсүз кабар көпчүлүккө жагымдуу болду, кубануу менен талкуулап жатканын байкап жатабыз. Бирок, саналуу топ тарабынан талаш-тартыштар жаралып, негизсиз тыянак чыгаруулар орун алып жатканын көрүп жатабыз.

Президент мурдагы эл башчылары менен эмне максатта бир тегерек столго чогулганын, негизги максатын өзүнүн билдирүүсүндө ачык айтты. Анда, мурдагы президенттерди кайсыл бирин мыйзам жоопкерчилигинен бошотуп, аларды өлкөгө кайтарып келүү жөнүндө сөз айтылган жок.

Тескерисинче, эгемендик алган жылдардан бери саясий көз караштардын кагылышы, улуттун өзөгүнө олуттуу сокку уруп келе жаткан регионализм, трайбализм көйгөйлөрүн чечүү менен элдин ынтымагын бекемдөө - башкы максат болгону ачык айтылган.

Муну менен президент Садыр Жапаров өткөн кеткенге кылчайбай, мамлекет башчысы катары тарых алдында жана келечек муун алдында өз вазыйпасын аткарды. Мындан кыйкым издеп, президенттин элди ынтымака чакырган ниетин кайра тескери жакка буруп, ич ара бөлүнүп-жарылып, тирешти ого бетер козутпайлы.

Мамлекет башчынын жакшы ниетин колдогондун ордуна, кайра аркы же берки өйүз болуп, акыйнек айтышып отурганыбыздын өзү, тарыхы бай, айкөл эл катары, улут катары бизди кооздобойт.

Ооба, Кыргызстанды башкарып кеткен ар бир президенттин жакшы да жактары, кемчиликтерди да болду. Баары мамлекет жана эл үчүн иштешти, аракет кылышты. Ошону менен катары каталарды да кетиришти. Ал эми азыр анын баары тарых. Ким кандай каталарды кетиргенин баарыбыз жакшы билебиз. Ошентсе да, “өткөн-кеткенге кылчактап, таарынычтарды ортого салып отура берсек келечек болбойт. Алдыга жылалы” – деген, жакшы ой Садыр Жапаровдун саясаттагы негизги приоритеттүү багыты.

Биз бир атадан тараган, бир мамлекеттин уул-кыздарыбыз, ич ара душмандашкандан баарыбызды жараткан сактасын. Ал же бул саясатчынын тарапташымын дегендердин баарын сабырдуулука чакырабыз, ынтымак бололу. Бири-бириңиздердин көңүлдү оорутуп, кайым айтышууну улантпаңыздар, токтотуңуздар”, - деп жазат Орунбеков.

Белгилей кетсек, буга чейин Садыр Жапаров эл-жердин түбөлүк ынтымагы үчүн мурдагы президенттердин башын бириктирип, бир столго олтургузгандыгын айткан. Жолугушууга Аскар Акаев, Курманбек Бакиев, Роза Отунбаева, Алмазбек Атамбаев, Сооронбай Жээнбеков катышкан.