Бишкек, 20.02.18 /Кабар/. Бүгүн, 20-февралда Кыргыз Республикасынын Жогорку Кеңешинин Төрагасы Дастанбек Жумабеков Чолпон-Ата шаарындагы Ысык-Көл аймактык ооруканасына барып, “Алтын-Көл” пансионатынын абалы менен да таанышты. Ошондой эле Чырпыкты айылындагы мектептин курулушун да көрүп чыкты. Бул тууралуу парламенттин басма сөз кызматы билдирди.
Белгилей кетсек, Ысык-Көл аймактык ооруканасынын негизги имараты 1975-жылы салынып, ишке берилген. Бирок, 33 жыл аралыгында имаратта капиталдык оңдоп-түзөө иштери жүргүзүлгөн эмес. 2011-жылы гана Ысык-Көл өнүгүү фондусунун каржылоосу менен 18 млн. сомго капиталдык оңдоп-түзөө иштери башталып, оорукананын эшик терезелери, канализация жана электр жарыгын берүү системалары жаңыртылган. Учурда аталган оорукананын жугуштуу оорулар бөлүмүнүн имараты да оңдоп-түзөөгө муктаж. Ал үчүн 13 млн. сом акча каражаты керектелери эсептелген. Андан тышкары, лабораториясын да тиешелүү оңдоп-түзөөдөн өткөрүү зарылчылыгы айтылды.
Жогорку Кеңештин Төрагасы андан ары “Алтын-Көл” мекемелик пансионатынын абалы менен таанышып, Чырпыкты айылындагы курулушу токтоп калган мектептен да кабар алды. Он жылдан бери курулушу уланып келе жаткан мектеп имаратын толугу менен бүткөрүү үчүн 22 млн. сом керектиги белгиленди. Бирок, бюджеттен жыл сайын аз өлчөмдө гана акча каражаты которулгандыктан, курулушу дагы деле уланууда. Төрага Дастанбек Жумабеков аталган көйгөйдү чечүүгө көмөктөшөрүн убада кылып: “Социалдык мекемелер биз үчүн өтө артыкчылыкка ээ. Мектептер менен ооруканалардын бардыгы заманбап шартка ылайыкташтырылып курулушу керек”, – деди.
Пикир
Оставить комментарий