2020-жылдагы ажылык сапарына каттоо 16-декабрдан 30-декабрга чейин жүргүзүлөт

Бишкек, 12.12.19. /Кабар/. 2020-жылдагы ажылык сапарына баруучу талапкерлерди каттоого алуу электрондук ID-карт паспорттун негизинде 2019-жылдын 16-декабрынан 30-декабрына чейин жүргүзүлөт. Бул тууралуу Кыргызстан мусулмандарынын дин башкармалыгынан (КМДБ) билдиришти.

Маалыматка ылайык, талапкерлер КМДБ түзүмүндөгү облустук, шаардык казыяттарда жана райондук хатибияттарда, РСК банкына төлөнгөн алгачкы 500 АКШ доллар жана кайтарымсыз 700 сомдун төлөнгөн квитанциясынын негизинде каттоого алынат.

Талапкерлерди ажылык серверге аймактык кезекке тургузуу бир гана алгачкы төлөгөн 500 АКШ доллар квитанциясынын негизинде жүргүзүлөт.

Электрондук каттоого катыша турган ажыга баруучуларга коюлган талаптар:

1. 2020-жылы Ажылыкка каттоо тартиби бир гана электрондук ID-карт паспорттун негизинде жүргүзүлөт.
2. Ажылык наркынын ичинен (калькуляцияда көрсөтүлгөн) алдын ала 500 АКШ доллар РСК банкына (ажылык-2020 эсебине) төлөгөндүгү тууралуу квитациянын түп нускасы.
3. Ажылыкка катталуу үчүн кайтарымсыз төлөмдүн РСК Банкына (ажылык-2020 эсебине) төлөнгөн (700сом) квитациясынын түп нускасы.
4. Ажылыкка баруучунун жашаган жериндеги каттоо 2019-жылдын 1-августунан кем болбоосу шарт. (Эски паспорттун мөөнөтү бүтүп алмаштыргандан башкасы).
5. Тышкы паспорту. (электрондук ID-карт паспорт менен тышкы паспорт бир баракка көчүрүлүүсү зарыл). (Тышкы паспорттун жарамдуулук мөөнөтү 2021-жылы 31-январь айына чейин бүтүүсү жараксыз).
6. Аял киши үчүн махрамдын болуусу шарт. (Күйөөсү менен барса нике күбөлүгү ал эми махрамы менен барса туулгандыгы тууралуу күбөлүк талап кылынат). 1975-жылы май айында төрөлсө метирке же нике күбөлүгүнүн көчүрмөсү талап кылынат, ал эми июнь айында төрөлсө документтин түп нускасы талап кылынат.
7. (3х4) көлөмүндөгү 4 сүрөт. (Сүрөт түстүү, ак фондо, жылтырабаган (матовый) кагазда болуусу шарт). (Аялдар үчүн сүрөткө ак жана кара жоолук, ал эми эркектер ак көйнөк жана ак баш кийим менен түшкөнгө болбойт). (Фотошоп программасы менен оңдолуп-түзөлгөн сүрөттөр жараксыз деп таанылат).
8. №086у формасындагы медициналык справка.
9. Персоналдык маалыматтарды иштеп чыгууга макулдугун берген катка кол коюу. (ID-карт паспортунда көрсөтүлгөн колу гана жарактуу)
10. Келишимге кол коюу жана Ажылык серверге киргизүү. (ID-карт паспортунда көрсөтүлгөн колу гана жарактуу).
11. Ажылык визасын алуу үчүн анкетага кол коюу. (Тышкы паспортунда көрсөтүлгөн колу гана жарактуу).
12. Ажыга баруучунун кийим өлчөмү жана жеке телефон номери, каттап жаткан операторго берүүсү талап кылынат.
13. Ажылыкка баруучу жарандын жашы 18 жаштан төмөн болбоосу шарт. (2020-жылы 18 жашка толуучу жарандар ажыга барууга укуктуу).
14. Сауд Араб Падышалыгы тарабынан же САПтын ажылык базасынан (Масар электрония), виза алуу учурларда, мурда ажыга барган талапкерлерге калькуляциядан тышкары кошумча төлөмдөр пайда болсо, ажыга баруучу талапкер өзү төлөйт. (Бул маалыматты операторлор, мурда ажыга барган ар бир ажыга баруучуга тааныштырып, келишимге кол койдурат).

Эскертүү:

• 2020-жылы ажылыкка баруучу жарандар КМДБ тарабынан жарыяланган мөөнөттүн ичинде каттоодон өтүүсү тийиш. Андан кечиккен жарандар каттоого алынбайт.
• Жогорудагы талаптар өзгөртүлсө же кошумчаланса маалымдалат.