Бишкек, 09.03.21. /Кабар/. Кыргыз Республикасынын президентинин аппаратынын жетекчиси Сүйүнбек Касмамбетов бүгүн, 9-мартта, 2026-жылга чейинки мезгилде өлкөнү өнүктүрүүнүн орто мөөнөттүү артыкчылыктарын аныктоо программасын иштеп чыгуу боюнча ведомстволор аралык эксперттик топтун биринчи жыйынын өткөрдү. Бул тууралуу президенттин аппаратынын маалыматтык саясат бөлүмү билдирет.
Сүйүнбек Касмамбетовдун белгилешинче, азыркы учурда жүрүп жаткан конституциялык реформаларга, мамлекеттик башкаруу системасындагы өзгөрүүлөргө жана коронавирус пандемиясына байланыштуу 2018-жылы бекитилген «2018-2040-жылдары Кыргыз Республикасын өнүктүрүүнүн улуттук стратегиясы» программасына өзөртүүлөрдү киргизүү зарылдыгы келип чыкты.
Ошондуктан, 2026-жылга чейинки мезгилге – Кыргыз Республикасын өнүктүрүүнүн орто мөөнөттүү артыкчылыктарын аныктоо үчүн сунуштарды иштеп чыгуу боюнча ведомстволор аралык эксперттик топ түзүлдү.
Эксперттик топтун жетекчилигине Кыргыз Республикасынын Президентинин Аппаратынын Жетекчисинин орун басары Бектур Зулпиев, анын орун басарлыгына Президенттин Аппаратынын cтратегиялык өнүктүрүү, экономика жана финансы саясаты бөлүмүнүн башчысы Искандер Гайпкулов бекитилди.
Президенттин Аппарат Жетекчиси эксперттик топтун астында турган негизги эки милдетти белгиледи:
- биринчиден, коронавирус пандемиясына байланыштуу келип чыккан кризисти, конституциялык жана мамлекеттик башкаруу системасында жүрүп жаткан реформаларды эске алуу менен 2026-жылга чейинки мезгилге Кыргыз Республикасын өнүктүрүүнүн орто мөөнөттүү артыкчылыктарын жаңылоо боюнча сунуштарды иштеп чыгуу;
- экинчиден, орто мөөнөттүү келечекке экономикадагы негизги жана түзүмдүк реформалар топтомун даярдап чыгуу.
Сүйүнбек Касмамбетов жакынкы жылдарга мамлекеттик саясат эки стратегиялык милдеттен - пандемиянын кесепеттеринен экономиканы калыбына келтирүү боюнча антикризистик чараларды тез арада ишке ашыруудан, ошондой эле кескин жана системалуу реформаларды жүргүзүү менен экономикалык өсүштү тездетүүдөн турарын белгиледи.
Эксперттик топко тез арада төмөндөгүлөр тапшырылды:
- 2018-2040-жылдарга Кыргыз Республикасын өнүктүрүүнүн Улуттук стратегиясын ишке ашыруунун жүрүшү жөнүндө 2019-жылга отчетун талдоо, анын жыйынтыгы боюнча, 2040 Стратегиясын оңдоо боюнча сунуштарды даярдоо;
- COVID-19, конституциялык реформа жана мамлекеттик башкарууну реформалоо менен шартталган кризистик көрүнүштөрдү эске алуу менен, 2026-жылга чейинки мезгилге Кыргыз Республикасын өнүктүрүүнүн орто мөөнөттүү артыкчылыктарын актуалдаштыруу боюнча сунуштарды даярдоо;
- орто мөөнөттүү мезгилге жана 2026-жылга чейинки экономикада түзүмдүк реформаларга ири реформалардын топтомун даярдап берүү.
Анын курамына Президенттин Аппаратынын, Коопсуздук кеңешинин катчылыгынын, министрликтер менен ведомстволордун өкүлдөрү кирди.
Пикир
Оставить комментарий