Бишкек, 17.02.24. /Кабар/. Ала-Бука – Жаңы-Базар – Кировка автоунаа жолунда калып калгандар куткарылды. Бул тууралуу Өзгөчө кырдаалдар министрлигинен билдиришти.
Маалыматка ылайык, Чаткал районунун Ала-Бука – Жаңы-Базар – Кировка автоунаа жолунун болжол менен 79-80 чакырым аралыгында кар күрткү пайда болуп, "Mercedes Benz Sprinter" үлгүсүндөгү 2 унаа (болжол менен 20 жүргүнчүсү менен) жана 1 жеңил унаа жолдо калып калгандыгы тууралуу маалымат 112 кызматына түшкөн.
Жалпы 21 жаран үчүн ӨКМдин Кыргызгидромет кызматынынын "Чапчыма" кар көчкү станциясында 2 бөлмө даярдалып, тамак-аш менен камсыздалып, жайгаштырылган. Абалдары туруктуу. Учурда станцияда 9 жаран түнөп калышты. Калган 12 жаран жолун улантышкан.
Ал эми унаа жолго кар көчкү түшүү кооптуулугу болгондугуна байланыштуу Чаткал райондук мамлекеттик администрациясынын башччысынын буйругу менен 16-февраль саат 09:30дан тартып аба ырайы турукташканга чейин жол каттамы толук жабылган.
34-101-чакырымдарында ИИМдин Жол кыймылынын коопсуздугун камсыздоо башкы башкармалыгынын кызматкерлери тарабынан атайын посттор уюштурулган.
Жолду тазалоо иши аба ырайы турукташкандан кийин №27 Жол тейлөө ишканасы тарабынан улантылат.
Пикир
Оставить комментарий