Бишкек, 15.07.22. /Кабар/. Ала-Бука районунда беш жашар кызга ыплас аракеттерди жасаганга шектелип 40 жаштагы эркек кармалды. Бул тууралуу Жалал-Абад облустук ички иштер башкармалыгынын маалымат кызматы билдирди.
Маалыматка ылайык, 14-июлда Ала-Бука райондук милициясына 32 жаштагы аял арыз менен кайрылган. Арызда 13-июлда болжол менен саат 16:00дө беш жашар кызын жашы 35-40тер чамасындагы белгисиз жаран үйүнүн жанындагы дүкөндөн балмуздак жана шириндиктерди алып берип, жакын жерде жайгашкан бакка ээрчитип, ыплас аракеттерди жасаганын жазган.
Аталган арыз кылмыштардын бирдиктүү реестрине катталып, Кылмыш-жаза кодексинин 158-беренеси (“Ыплас аракеттер”) менен кылмыш иши козголуп, тергөө амалдары жүргүзүлө баштаган.
Окуя болгон жерге кароо жүргүзүлүп, соттук-медициналык экспертиза дайындалган жана жогоруда көрсөтүлгөн факты боюнча тиешелүү тапшырмалар берилген.
Жүргүзүлгөн ыкчам иликтөө иш-чаралардын натыйжасында Ала-Бука районунун 40 жаштагы К.Н., аттуу тургуну тергөөгө камсыздалып, суракка алынган жана ага карата шектүү катары кабарлама берилген.
Шектүү Ала-Бука райондук милициясынын убактылуу кармоочу жайына киргизилген.
Учурда тергөө амалдары жүргүзүлүп жатат.
Пикир
Оставить комментарий