Бишкек мэриясы: Автобус жана троллейбуста жол кирени эми Элкарт картасы менен төлөөгө болот

Бишкек, 16.05.22. /Кабар/. Эми Бишкектин коомдук транспортунда жол кирени байланышы жок Элкарт банк карталары менен төлөөгө болот.

Бишкек мэриясынан билдиришкендей, жаңы функция пилоттук режимде бардык коомдук транспортто жеткиликтүү.

Жол киренин акысын төлөө үчүн байланышы жок төлөмдү кабыл алуу белгиси бар "Тулпар" валидаторуна банк картасын тиркөө керек жана төлөм өткөнгө чейин бир-эки секунд күтүү керек.

Терминалдар төлөм үчүн Кыргызстандын бардык банктарынын байланышы жок Элкарт карталарын кабыл алат. Жарандар жол акысын каалаган банктын контактсыз Visa карталары менен төлөөнү уланта алышат.

Долбоорду борбор калаанын мэриясы долбоордун өнөктөш банкы «Тулпар Кыргызкоммерцбанк» жана Элкарт улуттук төлөм системасы менен биргеликте ишке ашырды.