Бишкек, 03.08.23. /Кабар/. Билим берүү министрлиги ката менен басылган “Англис тилин үйрөнөбүз” (авторлору: Бакирова Н., Ракимова Ч.) аталашындагы китеп тууралуу үн катты.
Ведомстводон белгилешкендей, жогоруда аталган китеп министрликке караштуу Кыргыз билим берүү академиясы тарабынан да, “Окуу китеби” республикалык илимий-практикалык борбору тарабынан да тиешелүү экспертизалардан өткөрүлгөн эмес.
"Ошондой эле жыл сайын министрлик тарабынан бекитилүүчү Кыргызстандын жалпы билим берүү уюмдарына окуу процессинде колдонуу үчүн сунушталуучу окуу китептеринин тизмесине киргизилген эмес", - деп айтылат маалыматта.
Министрлик тиешелүү экспертизалардан өткөрүлбөгөн китептерди колдонууга сунуштабайт.
Такталган маалымат боюнча, бул китеп 2014, 2021-жылдары авторлордун жеке каражаттарына басылып, коммерциялык максатта сатыкка чыгарылган.
Ушундан улам министрлик ата-энелерден балдарына китеп сатып берүүдө китептин грифи (уруксаты) бар-жогуна көңүл буруусун суранат. Ошондой эле авторлорго жана жеке менчик басмаларга китеп басуу өндүрүшүндө КР тиешелүү мыйзамдарынын жана мыйзамдык актыларынын талаптарын аткаруу керектигин эскертет.
Пикир
Оставить комментарий