Бишкек, 12.10.24. /Кабар/. Бишкекте Кыргызстан менен Европа Биримдигинин Өнүктүрүү подкомитетинин 6-жыйыны өттү. Бул тууралуу Тышкы иштер министрлигинен билдиришти.
Кыргыз делегациясын КР тышкы иштер министринин орун басары Айбек Молдогазиев, ал эми европалык делегацияны Еврокомиссиянын эл аралык өнөктөштүк боюнча башкы дирекциясынын Жакынкы Чыгыш жана Борбор Азия бөлүмүнүн директору Сара Риналди жетектеди.
Өнүктүрүү боюнча подкомитеттин күн тартибинде Кыргызстандын инфраструктуралык жана инвестициялык артыкчылыктары жана Европа Биримдиги менен кызматташуунун негизги инструменттерин ишке ашыруунун жүрүшү талкууланды.
Айбек Молдогазиев жана мамлекеттик органдарынын өкүлдөрү европалык тарапка Кыргызстандын өкмөтүнүн инфраструктураны өнүктүрүү боюнча артыкчылыктуу багыттарын, ошондой эле аймактык кызматташуунун келечегин жана бул тармакта Кыргызстанды Европа Биримдигинин аймактык программаларына натыйжалуу киргизүүнү сунушташты.
Жакынкы Чыгыш жана Борбордук Азия департаментинин директору Сара Риналди позитивдүү саясий жетишкендиктерге, атап айтканда, Европа Биримдиги менен Өркүндөтүлгөн өнөктөштүк жана кызматташтык келишимине кол коюлганына токтолду. Ал ошондой эле Глобалдык шлюз демилгесинин алкагында транспорт, санариптештирүү, энергетика жана маанилүү заттар сыяктуу тармактарда долбоорлорду ишке ашыруу пландары, ошондой эле бюджеттик колдоону ишке ашыруу жана пландаштыруу боюнча маалымат берди.
КР-ЕБ өнүктүрүү подкомитетинин отурумунун жүрүшүндө эки тараптуу жана аймактык кызматташтыктын кеңири спектри боюнча конструктивдүү пикир алмашуу болуп, эки тарапты кызыктырган маселелер боюнча мындан ары да бекемдөө жана натыйжалуу кызматташуу пландары белгиленди.
Пикир
Оставить комментарий