Бишкек, 03.07.23. /Кабар/. Кыргызстандын тышкы иштер министри Жээнбек Кулубаев Кыргызстанга расмий сапары менен келген Малайзиянын тышкы иштер министри Замбри Абдул Кадир менен жолугушту.
Тараптырдын жолугушуусу бүгүн Бишкектеги "Ала-Арча" мамлекеттик резиденциясында өттү.
Жолугушуунун жүрүшүндө тышкы иштер министрлери саясий диалогду бекемдөө, жогорку деңгээлдеги сапарларды уюштуруу, соода-экономикалык кызматташтыкты активдештирүү, маданий-гуманитардык өз ара аракеттенүү маселелери талкууланды.
Министр Жээнбек Кулубаев Кыргызстандагы ички саясий трансформациялар жана өлкө жетекчилиги тарабынан экономиканы өнүктүрүүгө, жумуш орундарын түзүүгө жана жарандардын жыргалчылыгын жогорулатууга багытталган реформалар тууралуу айтып берди. Жээнбек Кулубаев кыргыз-малайзиялык соода-экономикалык мамилелерди, анын ичинде айыл чарба продукциясын экспорттоо, санарип өнөр жайы, кайра иштетүү өнөр жайы, жашыл экономика жана халал индустриясын өнүктүрүү мүмкүнчүлүгүн карап чыгууну сунуштады.
Өз кезегинде Замбри Абдул Кадыр Кыргызстан менен Малайзиянын ортосундагы мамилелер достукка жана өз ара урматтоого негизделгендигин баса белгилеп, малайзиялык тарап эки тараптуу форматта биргелешкен активдүү ишке, анын ичинде эл аралык жана аймактык уюмдардын алкагында кызматташууга даяр экендигин билдирди. Ал ошондой эле медицина жана билим берүү тармактарын өз ара аракеттенүүгө басым жасады.
Мындан тышкары, тараптар министрлердин орун басарларынын деңгээлинде ТИМ аралык саясий консультацияларды уюштурууну талкуулашты.
Эки мамлекеттин тышкы иштер министрликтеринин башчылары саясий, дипломатиялык, соода-экономикалык, социалдык-гуманитардык жана башка чөйрөлөрдө жигердүү практикалык кызматташууну улантаарына бекем ишенимдерин билдиришти.
Жолугушуунун жыйынтыгында Кыргыз Республикасы менен Малайзиянын тышкы иштер министрликтеринин ортосундагы эки тараптуу кызматташуу боюнча документке кол коюлду.
Пикир
Оставить комментарий