Бишкекте Кырсыктардын тобокелдигин азайтуу күнүнө арналган иш-чара өттү

Бишкек, 11.10.24. /Кабар/. Өзгөчө кырдаалдар министрлиги Т.Усубалиев атындагы аянтта өткөн Кырсыктардын тобокелин азайтуу күнүнө арналган иш-чара өткөрдү.

Ага Бишкек шаарынын мэри Айбек Жунушалиев, ӨКМдин Калкты жана аймактарды коргоо башкармалыгынын башчысы Асан Сулайманов, ӨКМдин Бишкек шаардык башкармалыгынын өкүлү Эрнест Жусупов, ошондой эле жарандык коргонуу кызматтарынын кызматкерлери, студенттер, мектеп окуучулары жана шаар тургундары, коноктору катышты.

Айбек Жунушалиев коомчулуктун маалымдуулугун жогорулатуу жана шаар тургундарынын коопсуздугун камсыздоо үчүн мындай демилгелердин маанилүүлүгүн белгиледи.

"Кырсык коркунучун азайтуу – бул бардык кызматтардын биргелешкен аракетин жана жарандардын активдүү катышуусун талап кылган милдет жана калкты маалымдоо жана даярдоодо негизги ролду ойнойт", -деди калаа башчысы.

Ошондой эле парадга "Бишкекжылуулуктармагы", "Бишкексууканал", "Бишкекжашылкурулуш", "Тазалык", "Бишкекасфальтсервис" ишканаларынын кызматкерлери, ошондой эле авариялык-куткаруу бөлүмдөрүнүн адистери катышты. Кыргыз Республикасынын Өзгөчө кырдаалдар министрлиги, ошондой эле куткаруу кызматтары шаардын мүмкүн болуучу өзгөчө кырдаалдарга даярдыгын көрсөтүп, катышуучуларды бир максаттын – калкты кырсыктардан коргоонун айланасына бириктирди.

Салтанаттуу иш-чара Өзгөчө кырдаалдар министрлигинин техникаларынын жана бөлүктөрүнүн парады менен коштолду.

Ал концерттик программа жана интерактивдүү оюндар менен аяктады.