• 89.42
  • 96.93
  • 0.98

Бишкекте Түрк мамлекеттеринин санариптештирүү боюнча башчыларынын жыйыны өтүүдө

Коом 0

Бишкек, 07.12.23. /Кабар/. Бишкекте Түрк мамлекеттеринин уюмуна мүчө-өлкөлөрдүн маалыматтык жана коммуникациялык технологиялар органдарынын башчыларынын 5-жыйыны өтүүдө.

Иш-чараны Түрк мамлекеттер уюмунун башкы катчысы Кубанычбек Өмүралиев жана санариптик өнүктүрүү министри Нурия Кутнаева кириш сөзү менен ачышты. Алар өлкөлөрдүн санариптик мекемелердин жетекчилерине иш-чарага катышып жатышкандыгы жана жемиштүү кызматташууга умтулуусу үчүн ыраазычылыктарын билдиришти.

Андан ары өз сөзүндө Нурия Кутнаева Кыргызстандын санариптик трансформациянын алкагындагы жетишкендиктери жана тажрыйбалары менен бөлүштү, министрдин маалыматынын негизинде:

- Кыргызстанда кең тилкелүү байланыштын орнотуу деңгээли 2019-жылы 19% дан 2023-жылы 31% га чейин өстү;

- 4G технологиясы менен Кыргыз Республикасынын калктуу конуштарынын 98% камтылган;

- "Түндүк" санариптик платформасынын базасында мамлекеттик органдардын жана жеке компаниялардын 300 маалыматтык системасынын ортосунда маалымат алмашуу 1 миллиарддан ашык транзакцияны түздү;

- өлкөдө санариптик документтер платформасына - айдоочулук күбөлүк, ID карта, транспортту каттоо жөнүндө күбөлүк киргизилген жана юридикалык күчкө ээ;

- бардык мамлекеттик органдар электрондук документ жүгүртүүгө өтүштү.

Министр белгилегендей, мамлекет мамлекеттик кызматтарды санариптештирүү, "акылдуу" шаарларды, телемедицинаны, "акылдуу" айыл чарбасын, билим берүүнү жана башка тармактарды өнүктүрүү үчүн шарттарды түзүү аракетинде санариптик технологияларды өнүктүрүүгө өзгөчө көңүл бурат.

Ошондой эле министр Түрк мамлекеттер уюмуна мүчө-өлкөлөр үчүн санариптик документтерди келечекте Түрк мамлекеттер уюму алкагында иштеп чыгуу демилгеси катары колдонууну сунуштады.

Сөзүнүн аягында министр бардык кызыкдар тараптар менен өз ара пайдалуу жана көп вектордуу кызматташууга даяр экендигин билдирди.

Иш-чарада Азербайжандын санариптик өнүктүрүү жана транспорт министринин орун басары Самир Маммадов, Казакстандын санариптик өнүктүрүү, инновациялар жана аэрокосмостук өнөр жай боюнча Вице-министри Аскар Жамбакин, Түркиянын транспорт жана инфраструктура министринин орун басары Омер Фатих Саян, Өзбекстандын санариптик технологиялар министринин Ардактуу кеңешчиси Махсум Махмудов сөз сүйлөштү.

Иш-чаранын жыйынтыгында катышуучулар демилгелерди жана аларды ишке ашыруу боюнча мындан аркы аракеттерди талкуулашты. Отурумдун жыйынтыгы боюнча Түрк мамлекеттер уюмунун Маалыматтык коммуникациялык технологиялар үчүн жооптуу министрлердин 5-кеңешмесинин Биргелешкен декларациясына кол коюлду.

Белгилей кетсек, Кыргызстандын президенти Садыр Жапаров Астанада өтүп жаткан 10-чу Түрк мамлекеттер уюмуна мүчө-өлкөлөрдүн башчыларынын саммитинде кыргыз тарап Кыргызстанда 2024-жылы Түрк мамлекеттер уюмунун саммитин өткөрүүгө даяр экенин жарыялаган, анын алкагында "санариптик форум" иш-чарасы уюштурулмакчы.

Маалымдама: Түрк мамлекеттеринин Уюму - түрк элдеринин ортосундагы ар тараптуу кызматташуу максатында Азербайжан, Казакстан, Кыргызстан, Түркияны, Өзбекстанды бириктирген эл аралык уюм. Уюм 2009-жылдын 3-октябрында түзүлгөн.

Уюмга байкоочу болгон өлкөлөр: Венгрия, Түркмөнстан, Түндүк Кипр Түрк республикасы.

Уюмдун башкы органдары:

- Мамлекет башчыларынын Кеңеши

- Тышкы иштер министрлеринин кеңеши

- Аксакалдар кеңеши

- Улук кызмат адамдарынын комитети жана катчылыгы.

Уюмдун ишмердүүлүгүн түрк тилдүү өлкөлөрдүн Парламенттик ассамблеясы (ТүркПА), Түрк маданиятынын эл аралык уюму (Түрксой), эл аралык Түрк академиясы, Түрк маданияты жана Мурас Фонду, Түрк ишкерлер кеңеши, түрк университеттеринин Союзу жана түрк соода-өнөр жай палатасы сыяктуу тектеш жана аффилирленген уюмдар да колдойт.

2011-жылдан бери уюм белгилүү бир темалар боюнча жылдык саммиттерин өткөрүп келет, анда мүчө мамлекеттердин башчылары өткөн мезгилди баалап, кийинки жылга максаттарды коюшат.

Пикир

Оставить комментарий