Бишкек, 17.10.23. /Айпери Кожоева - Кабар/. Бишкекте Алыкул Осмонов атындагы Улуттук китепканада “Чыңгыз Айтматов жана азыркы заман” китебинин бет ачары өттү.
Китептин автору азербайжандык публицист, тарыхчы, саясатчы, теолог – Теймур Атаев.
Автор тарабынан китепте Чыңгыз Айтматовдун “Кылым карытар бир күн”, “Кыямат”, “Деңиз бойлой жорткон ала дөбөт”, “Саманчынын жолу”, “Жамийла”, “Кассандра тамгасы” жана анын акыркы чыгармасы “Тоолор кулаганда” сыяктуу адабий шедеврлери ачылып берилген.
Атаев китебинде Чыңгыз Айтматовду учурдун улуу жазуучусу катары калыптандырган руханий факторлорун ачып берүү менен башка белгилүү жазуучулардын чыгармалары, дүйнөлүк диний ыйык жазуучулардын тексттери менен салыштырат.
Автор Айтматовдун чыгармачылыгы, мейкиндикке жана убакытка же жазуучуну талкундаткан проблемалар менен идеяларга баш ийбей, анын сүйүктүү каармандарынын сөзүндө берилгендиги менен жалпы адамзаттык мүнөзгө ээ экендигин көрсөткөн.
Ошондой эле китеп илимий-көркөм стилде жазылып, филологдордун, адабиятчылардын, гуманитардык факультеттин студенттеринин жана жалпы окурмандардын кеңири чөйрөсүнө арналган.
Аталган иш-чарага Жогорку Кеңештин депутаты Арсланбек Малиев, Азербайжандын Кыргызстандагы элчиси Латифа Сейфаддин оглы Гандилова, Роза Айтматова жана “Чыңгыз Айтматов атындагы Эл аралык Ысык-Көл форуму” коомдук бирикмесинин вице-президенти Ассоль Молдокматова жана башкалар катышты.
Пикир
Оставить комментарий