Бишкек, 07.08.18. /Кабар/. БишкектегиТарых музейинин ачылышы 2018-жылдын 30-августуна пландалууда. Бул тууралуу “Кабар” агенттигинде өткөн маалымат жыйынында Маданият, маалымат жана туризм министрлигинин Маданий мурасты сактоо башкармалыгынын башчысы Чолпон Тентиева билдирди.
Анын айтымында, музей 1925-жылы декабрь айында ачылган. Ошондон бери 2016-жылга чейин оңдоп-түзөө иштери жүргүзүлгөн эмес.
“Эми музей эл аралык стандарттарга жооп берет. Музейде экспедициянын жаңы системасы, оңдоочу лаборатория, музейди сактоо фонду, коомчулук менен байланыш түзүлүп, керек болгон технологиялар алынды”, - деди ал.
Тентиева билдиргендей, дүйнөлүк практикада музейдин реконструкциясы 8-10 жылга созулат.
“Биз 4 миң чарчы метр жерди 2 жылдын ичинде оңдодук. Экспозиция логикалык чынжырча боюнча коюлган. Башкача айтканда, коноктор тарыхыбызды башталышынан азыркы күнгө чейин катары менен көрө алышат”, - деди ал.
Чоңдор үчүн билеттин баасы 100 сом болот.
Музейдеги 500 экспонаттын жоголушу жана кылмыш иши тууралуу айтып жатып Чолпон Тентиева текшерүү жүрүп, акт түзүлгөнүн айтты. Экспонаттар 1963-1993-жылдар аралыгында жоголгону белгилүү болду. Учурда тиешелүү органдарда тергөө иши жүрүүдө.
Пикир
Оставить комментарий