Бишкек, 03.05.21. /Кабар/. Чүй облусунун тургундары Баткенге 1 млн сомдук гумжардам жиберди. Бул тууралуу видеону Аден Турусбеков фейсбуктагы баракчасына жүктөдү.
Видеодо Чүй облусунун тургунары биригип, Баткенге 1 млн сомдук жардам топтогону айтылат. Чүйдүн 8 районунан гумжардам чогултулган. “Эң зарыл болгон күнүмдүк буюм, азык-түлүк, тамак-аш, кийим-кече жүктөлдү. Мунун баары Чүйдүн айыл-кыштак, шаарларындагы карапайым калктын кошкон салымы, берген аманаты”, - деп жазат Аден Турусбеков.
Эскерте кетсек, 28-апрелде Баткен районунун Көк-Таш айылындагы суу бөлүштүрүүчү жайга Тажикстандын жарандары видеокөзөмөл орното баштаган. Ага кыргызстандыктар каршы чыгышкан, көп өтпөй эки элдин жарандары бири-бирине таш ыргытуудан абал курчуп кеткен.
Акыркы маалыматтарга караганда, кыргыз-тажик чек арасындагы чырдан жалпы 183 адам жабыркап, алардын 36сы набыт болгон.
Өзгөчө кырдаалдар министрлигинен билдиришкендей, Баткен аймагында жалпы 107 турак үй, 2 мектеп, 1 ФАП, 1 бала бакча, 10 май куюучу жай, 8 дүкөн, 4 соода түйүнү, 4 соцобъект жана 5 башка мамлекеттик имарат күйгөн жана жабыркаган.
1-майда УКМКнын төрагасы Камчыбек Ташиев Тажикстандын УКМК башчысы Саймумин Ятимов менен сүйлөшүүлөрдү жүргүзүп, 4 пункттан турган протокол кабыл алынганын айткан. Ошол эле күнү Тажикстанда барымтада турган Лейлек районунун Интернационал айылынын башчысы жана 9 жергиликтүү тургун кайтарылган.
Бүгүн, 3-майга карата Баткен облусунун бардык райондорунда жана айылдарында, мамлекеттик чек арасынын кыргыз-тажик тилкесинде кырдаал туруктуу.
Тараптар мамлекеттик чек ара тилкесинен аскер техникаларын чыгарып кетүү иштерин аякташты.
Пикир
Оставить комментарий