Бишкек, 06.12.24. /Кабар/. Эртең Бишкекте TalentforBIZ карьера иш-чарасы өтөт. Бул тууралуу Түркиянын президентинин аппаратынын кадр бөлүмүнөн билдиришти.
Маалыматка караганда, TalentforBIZ иш берүүчүлөр менен жаш таланттарды дүйнөнүн маанилүү борборлорунда жолуктуруп келет. Иш-чара 2019-жылдан бери 10 өлкөдө 16 жолу уюштурулган. Жолугушуу Кыргызстанда биринчи жолу өткөрүлөт.
Жаштардын чоң кызыгуусун жараткан TalentforBIZ Түркиянын компаниялары менен кыргыз жаштарын бириктирүүнү, университеттин студенттери менен бүтүрүүчүлөрдүн эки өлкөдө иш, тажрыйба топтоо жана билим алуу мүмкүнчүлүктөрүн пайдаланышын максат кылууда.
Иш-чарада Түркия менен Кыргызстандагы бир катар ишканалардын жетекчилеринин жана адистеринин презентациялары, маалымат семинарлары уюштурулат.
135 өлкөдө 2892 университеттин 2,2 миллион студентти, бүтүрүүчүсү жана 12 миңден ашык жумуш берүүчү пайдаланган жана Кыргызстанда да жеткиликтүү болгон “Жөндөм эшиги” санариптик платформасы жаштарга жумуш табууга мүмкүнчүлүк бере тургандыгы белгиленүүдө.
"Кыргыз тилиндеги платформа жаштарды кесипкөйлүккө даярдоого колдоо көрсөтүп, Түркия менен Кыргызстандын ортосундагы кадрдык кызматташтыкты бекемдейт", - деп айтылат маалыматта.
Пикир
Оставить комментарий