ИИМдин Ички аскерлеринин 714 аскер бөлүгүнүн түзүлгөнүнүн 11 жылдыгына жана күжүрмөн Тууну тапшырууга арналган иш-чара өттү

Бишкек, 05.10.21. /Кабар/. ИИМдин Ички аскерлеринин 714 аскер бөлүгүнүн (Атайын багыттагы отряд “Шер”) түзүлгөнүнүн 11 жылдыгына жана Күжүрмөн тууну тапшырууга арналган салтанаттуу иш-чара болуп өттү. Бул тууралуу ИИМдин Ички аскерлеринин басма сөз кызматы билдирет.

Маалыматка ылайык, салтанаттуу иш-чарага Кыргыз Республикасынын ИИМдин Ички аскерлеринин колбашчысы Исламбек Кенжекулов, республикалык жоокер энелер комитетинин төрайымы Уулкан Байгубатова, аскер бөлүктүн ардагерлери жана чакырылган меймандар катышты.

Өз сөзүндө колбашчы аскер бөлүктүн аскер кызматкерлери Бишкек шаарында жана өлкөбүздүн башка региондорунда, коомдук тартипти жана коомдук коопсуздукту камсыз кылуу боюнча күжүрмөн кызматтарды аткарууда, жогорку кесипкөйлүүлүктү көрсөткөндүгү үчүн ыраазычылык билдирди.

2005-жылдан тартып 2020–жылга чейинки жана 2021-жылдын апрель айындагы Баткен областында коомдук-саясий кырдаал курчуп турган мезгилде, “Шер” атайын багыттагы отряддын өздүк курамы коюлган тапшырмаларга жогорку деңгээлдеги жоопкерчиликти көрсөтө алгандыгын да баса белгилеп өттү.

"Себеби Ички аскерлердин атайын багыттагы отрядында Кыргызстандын чыныгы атуулдарынан турган кайраттуу жана чечкиндүү аскер кызматкерлери кызмат өтөшөт", - деди ал.

Салтанаттуу иш-чараны утурлай Ички аскерлердин колбашчысынын жана биргелешип иштеген мекемелердин буйруктарынын негизинде, бөлүктүн бир топ аскер кызматкерлери медалдар, баалуу белектер жана грамоталар менен сыйланышты.

Салтанаттуу иш-чара аскер бөлүктүн өздүк курамы тарабынан даярдалган кол уруш боюнча көрсөтмө сабагы жана майрамдык концерт менен аяктады.