Бишкек, 16-июнь /Кабар/. Казакстанда инфляциянын темпи жайлай баштаганы менен Евразиялык экономикалык биримдиктин аймагында эң жогорку бойдон калууда. Бул тууралуу Finprom сайты кабарлады. Ушул жылдын апрелиндеги жыйынтык боюнча Казакстанда жылдык инфляциянын көлөмү 7,5 пайызды түзгөн.
Сайттын иликтөөсү Улуттук экономика министрлигинин статистикасына таянат. Ага ылайык, 2015-жылдын октябрына чейин Казакстандагы инфляциянын жылдык деңгээли 4,4 пайызды түзүп, ЕАЭБ өлкөлөрүнүн ичинен эң төмөн болуп турган. Бирок 2015-жылдын августундагы девальвациядан кийин инфляция көрсөткүчү 9,4 пайызга чейин жогорулаган.
Finprom.kz сайтынын маалыматына караганда, Казакстан былтыркы инфляциянын деңгээли боюнча Беларустан (6,3 пайыз) дагы ашкан. Ал өлкө 2016-жылы кайрадан улуттук валютаны деноминация кылган.
Иликтөөдө ЕАЭБге мүчө өлкөлөрдүн ичинен инфляциянын эң төмөнкү көрсөткүчү Кыргызстан (3,8 пайыз) менен Арменияда (1,2 пайыз) экендиги айтылат.
Булагы CENTRAL ASIAN
Пикир
Оставить комментарий