Бишкек, 30.01.19. /Кабар/. Бишкек – Ташкент автобустук каттамы жабылды. Казакстан өз территориясы аркылуу автобустун жүрүшүнө каршы чыкты. Бул тууралуу "Транс-Союз-Азия" ишканасы кабарлады.
Бишкек–Ташкент автобусу 2018-жылдын май айында каттай баштаган.
Мекеменин маалыматы боюнча, каттам боюнча маселелер буга чейин Кыргызстандын, Өзбекстандын жана Казакстандын тиешелүү органдары тарабынан макулдашылган болчу. Бирок Астана 24-январда тараптардын макулдугу жок эле транзиттик каттамдын өз аймагынан өтүүсүнө тыюу салган.
Мындай чечимди казак тарап Бишкек – Жибек Жолу каттамы кайталанып жатканы менен түшүндүрдү.
"Транс-Союз-Азия" маселени чечүүгө керектүү документтер чогултулуп Астанага жиберилгенин билдирди. Кийин Казакстандын транспорт комитети Бишкек – Ташкент каттамы боюнча кызмат көрсөтүүчү компаниялардын арасына казакстандык ташуучу-фирманы кошууну сунуштаган.
Учурда Бишкек – Ташкент каттамы жабык. Бул каттам боюнча күнүнө бир тарапка эле 100 жакын адам каттачу.
Пикир
Оставить комментарий