Бишкек, 13-июнь /Кабар/. Үстүбүздөгү жылдын июнунда И.К. Ахунбаев атындагы Кыргыз Мамлекеттик медициналык академиясында Мамлекеттик тил боюнча туруктуу иштей турган комиссия түзүлдү. Бул тууралуу аталган окуу жайдын басма сөз кызматы билдирди.
Комиссиянын ишмердүүлүгү КММАда окутулуп жаткан баардык предметтер боюнча окуу программалардын, окуу иштелмелердин жана окуу китептердин кыргыз тилинде жазылышын жана кыргыз тилине которулушун, ошондой эле медициналык терминдердин колдонулушун бир тартипке келтирүү деп аныкталды.
Аталган комиссияны ЖОЖдун мамлекеттик тил жана тарбия иштери боюнча проректору, медицина илимдеринин доктору Кеңешбек Ырысов жетектейт. Анын курамында медицинанын ар кыл предметтери боюнча көп жылдардан бери сабак берип жүрүшкөн окумуштуу-мугалимдер ( У. Амираев, Т. Абдыкеримова, Н. Баатырова, Е. Бешкемпиров, Т. Жапаров, М. Мусуралиев, М. Субанбеков, Ж.Сыдыков, З. Эсенбеков), ошондой эле КММАнын мамлекеттик тилди өнүктүрүү секторунун башчысы А. Мамытов, кыргыз тили кафедрасынын башчысы Э.Абдырасулова, басма сөз катчысы А. Пазылов бар.
Комиссиянын биринчи отурумунда анын Жобосу менен иш-планынын долбоорлору талкууланды жана жактырылды.
Пикир
Оставить комментарий