Бишкек, 14.03.24. /Кабар/. Кыргызстанга Түркиянын экспортчулар биримдигинин 33 ишкерден турган делегациясы келди. Аны TIM төрагасынын орун басары Фикрет Килеч жетектейт.
КР Соода-өнөр жай палатасынын басма сөз кызматынан кабарлашкандай, бүгүн форум өтүп, ага экономиканын ар түрдүү тармактарын, анын ичинде саламаттыкты сактоо, курулуш, жеңил жана оор өнөр жай, химиялык жер семирткичтерди өндүрүү жана башка тармактардын өкүлдөрү катышкан кыргыз жана түрк ишкерлери катышты.
КР Соода-өнөр жай палатасынын президенти Темир Сариев быйылкы жылы өлкөлөр ортосундагы соода жүгүртүүнүн көлөмүн 2 млрд долларга жеткирүү зарылдыгын белгиледи.
"Эки өлкөнүн президенттери алдыга амбициялуу максат коюшту – товар жүгүртүүнү 5 миллиард долларга жеткирүү. Бул багытта Кыргызстан менен Түркиянын Соода-өнөр жай палаталары активдүү иш алып барышууда. Эки өлкөнүн ишканаларынын ортосундагы кызматташтыктын күчөшүнүн аркасында бул максат ишке ашарына ишенем", - деди Темир Сариев.
Форумдун алкагында B2B форматында жолугушуулар өткөрүлдү.
Кыргызстандын Соода-өнөр жай палатасы менен Түркиянын экспортчулар биримдиги эки өлкөнүн инвестициялык потенциалын өнүктүрүүгө негиз болуу жана алардын ишкерлеринин ортосундагы ишкердик байланыштарды чыңдоого көмөк көрсөтүү максатында кызматташуу меморандумуна кол коюшту.
Пикир
Оставить комментарий