• 87.99
  • 95.37
  • 0.97

"Кумтөр" 2024-жылы Тоголок алтын кенин өздөштүрө баштайт

Экономика 0

Бишкек 11.09.23. /Кабар/. "Кумтөр" кийинки жылдан баштап Тоголок кенин өздөштүрүү, Жангарт аянтына геологиялык чалгындоо жүргүзүү сыяктуу негизги иштерди баштайт.

"Кумтөр Голд компани" ЖАКтын басма сөз кызматы билдиргендей, тоо-кен геологдору, инженерлер, жол куруучулар жана экологдордон турган "Кумтөрдүн" адистери Ысык-Көл облусунун Жети-Өгүз районунда жайгашкан Тоголок кенине барып келишти.

Компаниянын вице-президенти Кубанычбек Турудукожоев, Кумтөр кен жайынын директору Кубанычбек Молдобеков башында турган адистер Тоголок алтын кенине жана Жангарт аянтына барып, 1982-жылы жабылган жантайма кен жолунун (штольня) жана Тоголокко барчу жол инфраструктурасынын абалын иликтеп, аймакка топографиялык изилдөө жүргүзүштү.

Бул маалыматтардын баары жакынкы келечекте – жол салууда жана кеңейтүүдө, жаңы көпүрөлөрдү курууда керектелет. Жол инфраструктурасы даяр болгон соң, кийинки жылдан баштап Тоголок кенин өздөштүрүү, Жангарт аянтына геологиялык чалгындоо жүргүзүү сыяктуу негизги иштер башталмакчы.

Тоголок кенине жетүү абдан татаал. Кенге сапар алган Кумтөрдүн адистери көздөгөн жерге 37 чакырым жетпей, Үч-Кошкон кыштагына түнөп алып, жолун улашкан. Себеби, андан ары жолдун эң таатал бөлүгү башталат. Бир канча ашууларды ашып, ак кар, көк муздуу кырлардан, кооптуу жарлардан, эңкейиштерден, шар аккан суулар менен жайык кечүүлөрдөн өтүп, анан Тоголок кенине жетүүгө болот. Баарынан да, аба-ырайы саат сайын өзгөрүп турган, деңиз деңгээлинен 4 миң метр бийиктикте бир канча саат жөө басуу оңойго турган жок.

Бирок бул тоскоолдуктардан өткөн экспедиция өз максатына жетти. Пландалган бардык жумуштар жасалган соң, адистер эки күндүк, 400 чакырымдык катаал жолду басып өтүү менен Кумтөр кен жайына кайтып келишти.

Пикир

Оставить комментарий