“Кыргызча оңой” колдонмосун жарандар активдүү колдонууда – Супатаева

Бишкек, 17.01.25. /Акназик Тургунбаева - Кабар/. Кыргыз тилиндеги “Кыргызча оңой” колдонмосун жарандар активдүү колдонууда. Бул тууралуу Мамлекеттик тил жана тил саясаты боюнча улуттук комиссиянын мониторинг жана талдоо бөлүмүнүн башчысы Алфира Супатаева радиолордун бирине берген маегинде билдирди.

Ал белгилегендей учурда котормо платформада 10 тилде котормо жүргүзүүгө болот.

“Мамлекеттик тил жана тил саясаты боюнча улуттук комиссия тарабынан ишке ашырылып жаткан “Кыргыз тилин табигый түрдө иштетүүчү программалык аппараттар” долбоорунун алкагында котормо программалык колдонмо иштелип чыкты. Долбоордун негизги максаты – мамлекеттик тилдин кеңири жана эффективдүү колдонулушун камсыздоо максатында Google Translate, Яндекс котормо платформалары сыяктуу улуттук платформадагы котормо кызмат көрсөтүүсүн же продуктусун колдонууга алып чыгуу”, - деди ал.

Ошондой эле ал колдонмону американын “Dualingo” мобилдик котормо платформасына үндөш кылып жасалганын белгиледи.

“Dualingo” мобилдик котормо платформасы дүйнөлүк рейтингде алдынкы орундарда турат. Албетте, биздин каражат бул платформага 100 пайыз окшош кылып жасагангажол бербейт. Бирок, бир аз да болсо үндөштүрүп жасаганга аракет кылдык”, - деди ал.

Эске салсак, 2023-жылы 17-июлда Садыр Жапаров “Мамлекеттик тил жөнүндө” конституциялык мыйзамга кол койгон. Ага ылайык, Мамлекеттик тил жана тил саясаты боюнча улуттук комиссия “Кыргызча оңой” деп аталган кыргыз тилин үйрөнүү боюнча мобилдик тиркеме иштеп чыккан.