Бишкек, 31.07.24. /Кабар/. Кыргыз-Өзбек эл аралык университетинин факультеттеринин биринин деканы кармалды. Бул тууралуу Улуттук коопсуздук мамлекеттик комитети билдирет..
Маалыматка ылайык, атайын кызмат тарабынан 2024-жылдын 26-июлунда Ош шаарындагы Кыргыз-Өзбек эл аралык университетинин гуманитардык-педагогикалык факультетинин деканы У.И.С. мамлекеттик экзаменде студенттерден акча талап кылгандыгы үчүн кармалды.
Белгилей кетсек, буга чейин КР Кылмыш-жаза кодексинин 343-беренесинин 1-бөлүгү (опузалап пара талап кылуу) менен Кыргыз-Өзбек эл аралык университетинин гуманитардык-педагогикалык факультетинин деканынын орун басары Д.у.Д кармалып, УКМКнын тергөө абагына 2 айга камакка алынган.
Жүргүзүлгөн тергөө-ыкчам иш-чаралардын жүрүшүндө аталган факультеттин деканы У.И.С. коррупциялык схемага тиешеси бар экендиги аныкталып, ал КР Кылмыш-процессуалдык кодексинин 96, 97-беренелерине ылайык кармалып, УКМКнын убактылуу кармоочу жайына эки суткага камакка алынды.
УКМК билим берүү системасындагы коррупция, паракорчулук фактылары тууралуу билдирүүгө чакырат.
Пикир
Оставить комментарий