Бишкек, 25.09.19. /Кабар/. Кыргызстандын премьер-министри Мухаммедкалый Абылгазиев Евразия Экономикалык Биримдигине (ЕАЭБ) мүчө мамлекеттердин ортосундагы тоскоолдуктарды атады.
Абылгазиев Бишкекте өтүп жаткан «Евразия жумалыгы» эл аралык форумунун алкагында билдиргендей, биринчиден - бул ЕАЭБдин ички рыногундагы тоскоолдуктар.
«2016-жылдан ушул күнгө чейин тоскоолдуктардын саны 279дан 18ге чейин кыскарганына карабастан, тоскоолдуктардын деңгээли дагы эле товарды эркин жүгүртүүгө жана тейлөөгө терс таасирин тийгизип жатат. Мен ушул жерден – өзүбүздүн ички рынокту коргоо менен, биз ЕАЭБ өлкөлөрүнүн өндүрүүчүлөрүнүн кызыкчылыгы үчүн глобалдуу ойлонуу керектигин өзгөчө белгилегим келет. Интеграциянын бир гана жолу бар – бул эркин рынок», - деп билдирип, аталган маселелер өкмөт башчылардын кийинки жолугушууларында да айтыла тургандыгын кошумчалады.
«Евразия экономикалык комиссиянын жетекчилигинин аталган көйгөйдү чечүү үчүн жетиштүү тажрыйбасы бар деп эсептейм», - деди Абылгазиев.
Өкмөт башчынын айтуусунда, экинчиден - ЕАЭБ мейкиндигиндеги санарип экономиканы жана чарба, ишкана, товарлардын бирдиктүү маалыматтык базасын түзүү керек.
«Маалыматтык система жана технологияны ишке киргизүү - учурдун талабы, ошондуктан, биз азыртан тарта пилоттук режимде ишти башташыбыз керек. Санарип технологияны киргизүү рынок ичиндеги атаандаштыкка болгон жөндөмдүүлүктү камсыз кылат», - деп кошумчалады ал.
Евразия экономикалык комиссиясынын төрагасы Тигран Саркисян аталган көйгөйлөрдү чечүү үчүн комиссия активдүү иш жүргүзсө боло тургандыгын билдирди.
Пикир
Оставить комментарий