АКШ Кыргызстанга жугуштуу ооруларды электрондук түрдө кабарлоонун жаңы системасын берди

Бишкек, 13.10.21. /Кабар/. Кечээ, 12-октябрда Бишкекте АКШнын Ооруларды көзөмөлдөө жана аларга каршы чара көрүү борборлору (CDC) Кыргызстандын Саламаттык сактоо жана социалдык өнүктүрүү министрлигине жугуштуу ооруларды электрондук түрдө кабарлоонун жаңы системасын тапшырды. Бул тууралуу АКШнын Кыргызстандагы элчилигинин басма сөз кызматы билдирет.

Бул система кабарлануучу жугуштуу оорулардын электрондук тизмесин берүү аркылуу ооруларды көзөмөлдөөнү жакшыртат. CDC жана Колумбия университетинин саламаттыкты сактоо тармагында иштеген уюму ICAP, 2021-жылдын январында Кыргызстандын Оорулардын алдын алуу жана мамлекеттик санитардык эпидемиологиялык көзөмөл департаментинин өтүнүчү боюнча шашылыш билдирүү жана каттоо тутумун иштеп чыгууну баштаган.

«Бул сыяктуу электрондук көзөмөл системалары коомдук саламаттыкты сактоо адистерине убакытты үнөмдөөгө жана натыйжада өмүрлөрдү сактап калууга жардам берет. Биз кыргызстандык жугуштуу оорулар боюнча адистерге COVID-19 жана башка оорулар менен күрөшүүдө бул программалык камсыздоону бергенибизге сыймыктанабыз. Бул долбоор коомдук саламаттыкты сактоо тармагындагы өнөктөштүгүбүздүн көптөгөн мисалдарынын бири гана. Бүгүн биз Борбор Азиядагы коомдук саламаттыкты жакшыртуу боюнча ондогон жылдар бою кабыл алынган милдеттенмеге таянып жатабыз», - деди CDCнин Борбор Азия боюнча директору Дэниэл Сингер.

Жаңы система аркылуу алынган так маалымат кыргызстандык медицина кызматкерлерине жугуштуу оорулардын өлкөдө кантип жайылып баратканы жөнүндө тезирээк жана жакшыраак түшүнүк алууга, ошого жараша өмүрлөрдү сактап калуучу ресурстарды бөлүштүрүүгө мүмкүндүк берет.

CDC - АКШнын алдынкы коомдук саламаттыкты сактоо агенттиги, коомдук саламаттыкты сактоо маселелери боюнча Борбор Азиянын өкмөттөрү менен көп жылдык кызматташтыкта. CDC биринчи кеңсесин 1995-жылы Алматыда ачкан жана бүгүнкү күндө анын кеңселери Казакстанда, Кыргызстанда, Өзбекстанда жана Тажикстанда бар.

CDC ар бир Саламаттыкты сактоо министрлиги менен кызматташып, өлкөлөр лабораторияларды, ооруларды көзөмөлдөөнү жана жумушчу күчтөрдүн потенциалын күчөтүү үчүн иштешет, ошондо өлкөлөр оорулардын чыгышын жакшыраак алдын алат, аныктайт жана жооп берет.