Бишкек, 24.05.22. /Кабар/. Министрлер кабинетинин төрагасы Акылбек Жапаров “Коомдук кабылдама” аркылуу кабыл алууга жазылган жарандарды кабыл алды. Бул тууралуу министрлер кабинетинин басма сөз кызматы билдирет.
Акылбек Жапаров балдарга жардам көрсөткөн, аларды дарылануусу жана реабилитациялоосу үчүн чет өлкөлөрдөгү медициналык мекемелерге жөнөткөн “Бирге ден соолук” коомдук фондунун жетекчиси Айнура Суванкулованы кабыл алды.
Айнура Суванкулова «Ден-соолукка бирге» коомдук фондунун алдында иштеп жаткан реабилитациялык борбор имаратка муктаждыгын айтты.
«Буга чейин реабилитациялык борбор үчүн коммерциялык жайды ижарага алганбыз, ал сатыкка коюлду. Мындан улам бизде дарыланып жаткан 92 бала көчөдө калышы мүмкүн. Биз буга жол бере албайбыз, анткени булар балдар, алардын көбү өз убагында жардам алышкан. Катуу күйүк алган баланын терисин толук калыбына келтирүү үчүн Германиядан операция жасатканга жетиштик. Мындай операциянын баасы болжол менен 1 миллион еврону түзөт. Ошондой эле аутизм менен ооруган балдардын социалдаштырууга жардам беребиз», - деди ал.
Өз кезегинде Акылбек Жапаров реабилитациялык борбор үчүн имарат маселеси көзөмөлгө алынарын баса белгиледи.
«Министрлер кабинети балдарга жардам көрсөтүүчү коомдук уюмдардын демилгелерин колдоого дайым даяр. Биз бул абалдан чыгуунун жолун издейбиз, мындан тышкары дагы башка жардам берүүгө даярбыз», - деп белгилеген министрлер кабинетинин башчысы мамлекеттик органдарга тиешелүү тапшырмаларды берди.
Андан ары, министрлер кабинетинин төрагасы Акылбек Жапаров социалдык объектилерди куруу боюнча мамлекеттик тендерди утуп алган компаниянын жана башка курулуш компаниялардын өкүлдөрү менен жолугушту.
Алардын кайрылуусунун негизги себеби: тендердик арыз берилгенден баштап бүгүнкү күнгө чейин курулуш материалдарынын кымбатташы.
Министрлер кабинетинин башчысы белгилегендей, буга чейин Кыргыз РеспубликасынынпПрезиденти «Мамлекеттик сатып алуулар жөнүндө» мыйзамга кол койгон. Бул мыйзамды аткаруу максатында министрлер кабинетинин токтомунун долбоору иштелип чыгып, анда баалардын өсүшү каралган. Ошону менен бирге министрлер кабинетинин башчысы курулушу 80-90% бүткөн объектилер ушул жылдын сентябрына чейин толук бүткөрүлүшү керектигин белгиледи.
«Кыргыз Республикасынын Финансы министрлигине жана министрлер кабинетине караштуу Архитектура, курулуш, турак жай-коммуналдык чарба мамлекеттик агенттигине тиешелүү чечим кабыл алууну тапшырам», - деди Акылбек Жапаров. Ал жакын арада узак мөөнөттүү курулуш объектилеринин маселесин чечүү үчүн жыйын өткөрөрүн кошумчалады.
Ошондой эле, министрлер кабинетинин башчысына 2011-жылы ат майданы курулган Сокулук районундагы жерлерди трансформациялоо маселеси менен ат майдандын директору Майор Райымкулов кайрылды.
Ал түзүлгөн кырдаалды эске алуу менен көрсөтүлгөн объектти баланска өткөрүү мүмкүн эместигин, мамлекеттик колдоо болбосо жакын арада жараксыз абалга келиши ыктымалдыгын билдирди.
Министрлер кабинетинин башчысы ипподром турган объектини Чүй облусунун Сокулук районунун балансына өткөрүп берүү менен трансформациялоо маселесин чечүүнү тапшырды.
Пикир
Оставить комментарий