Нарын облусундагы 42 айылды таза суу менен камсыз кылуу иштери жүрүүдө

Бишкек, 04.11.24. /Кабар/. Нарын облусундагы 42 айылды таза суу менен камсыз кылуу иштери жүрүүдө.

Суу ресурстары, айыл чарба жана кайра иштетүү өнөр жай министрлигинен билдиришкендей, Суу ресурстары кызматынын алдындагы "Ичүүчү суу менен камсыздоону жана саркынды сууларды чыгарууну өнүктүрүү" мекемесинин жетекчилигинин Нарын облусуна болгон жумушчу сапарынын алкагында 42 айылда курулушу жүрүп жаткан иштер текшерилди.

Региондогу 42 айылдын калкын ичүүчү суу менен камсыздоо республикалык бюджеттин эсебинен, ошондой эле Азия өнүктүрүү банкынын колдоосу менен ишке ашырылмакчы.

Бүгүнкү күндө Орто-Саз, Жалгыз-Терек, Жан-Булак, Төш-Булак айылдарында курулуш иштери бүткөрүлдү.

Таза суу маселеси чечилсе, мектептерде, бала бакчаларда жана медициналык мекемелерде санитардык абалды жакшыртат.

2026-жылга чейин 13 мектеп, бала бакча жана 8 медициналык мекеме заманбап санитардык тутумдар менен жабдылат. Учурда 20 социалдык объектте санитардык системаларды изилдөө жана долбоорлоо боюнча иштер башталды.