Бишкек, 10.10.24. /Акназик Тургунбаева - Кабар/. Бүгүн, 10-октябрда Ош шаарында Транспорттук каражаттарды жана айдоочулук курамды каттоо боюнча «Унаа» мамлекеттик мекемесинин күнү-түнү иштеген бөлүмү ачылды. Бул тууралуу мекеменин басма сөз кызматы билдирди.
Бөлүм Алишер Навои көчөсүндө жайгашкан. Бул жерден Кыргызстандын башка аймактарынан да мамлекеттик номурларды алууга болот, башкача айтканда, кызмат Ош шаарынын тургундарына гана жеткиликтүү эмес.
Аталган мекеменин директору Улан Карыпбеков бөлүмдүн ачылышы мамлекеттик кызмат көрсөтүүлөрдү модернизациялоого дагы бир кадам экенин баса белгиледи.
«Убакыт боюнча чектөөлөрдүн жоктугу шаар тургундарына жана конокторуна транспорт каражаттарын каттоо жана айдоочулук күбөлүктөрдү алууга байланышкан маселелерди тез арада чечүүгө мүмкүндүк берет, бул өзгөчө иштеген жарандар үчүн маанилүү», - деди Карыпбеков.
Маалыматка ылайык, кассалар күнү-түнү иштеп, төлөм терминалдары орнотулган. Ошондой эле мобилдик тиркемелер аркылуу же арыз тапшырууда пайда болгон QR кодун колдонуп кызматтар үчүн төлөй аласыз.
Пикир
Оставить комментарий