Бишкек, 23.08.23./Кабар/. Бүгүн, 23-август – кулчулуктун курмандыктарын эскерүүнүн жана аны жоюунун эл аралык күнүнө карата Ош шаарынын мэриясынын алдындагы адам сатуунун алдын алуу жана ага каршы күрөшүү боюнча Координациялык кеңештин жыйны болуп өттү.
Жыйынга Ош шаарынын мэринин орун басары Нурбек Кадыров, Кыргыз Республикасынын Эмгек, социалдык камсыздоо жана миграция министрлигинин өкүлү Бактыгүл Айдакеева, ЕККУнун Бишкек шаарындагы кеңсесинин өкүлү Амирхан Ишматов, Эл аралык коргоого көмөктөшүү борборунун өкүлү Акылбек Ташбулатов, Координациялык кеңештин мүчөлөрү жана муниципалдык аймактык башкармалыктарынын жетекчилери катышты.
Жыйындын күн тартибинде “Адам сатуунун алдын алуу жана ага каршы күрөшүү жөнүндө” мыйзамынын, “2022-2025-жылдарга Кыргыз Республикасында адам сатууга каршы күрөшүү” боюнча токтомунун Ош шаарында аткарылышы жөнүндө маселелер каралды.
Ошондой эле аталган маселелер боюнча координациялык кеңеш тарабынан аткарылган жумуштар, уюштурулган иш-чаралар тууралуу маалыматтар берилип, кулчулукка жана зомбулукка кабылган адамдардын укуктары, аларды ар тараптуу мажбурлап иштетүү, алдын алуу жана убагында жардам берүү жолдору талкууланды.
Жыйынтыгында, тиешелүү кызматтарга Ош шаарында жашы жете электер арасында эмгекке жана жыныстык эксплуатацияга мажбурлоо боюнча рейдтерди өткөрүү, жумушка орноштуруу агенттиктеринин ишмердүүлүгүн текшерүү, калк арасында адам сатуунун алдын алуу боюнча түшүндүрүү иштерин жүргүзүү тууралуу протоколдук тапшырмалар берилди.
Пикир
Оставить комментарий