Ошто райондук электр тармактары ишканасынын жаңы имаратынын курулушу аяктоодо

Бишкек, 17.04.23. /Кабар/. Ошто райондук электр тармактары ишканасынын жаңы имараты курулуп жатат.

Муниципалитеттен билдиришкендей, Ош мэри Бакытбек Жетигенов имараттын курулушу менен таанышты.

Белгиленгендей, райондук электр тармактарынын жаңы имараты шаардын батыш аймагынын жашоочуларын тейлөө сапатын жогорулатуу максатында курулууда. Учурда курулуш иштери аяктоо алдында турат.

Ош РЭТ ишканасынын башчысы Алмазбек Самидиновдун айтымында, имаратта 85 кызматкер иш алып барат. Жаңы имаратта тиешелүү иштөө шарттарынан тышкары атайын техникалар үчүн орундуктар, спорттук жана маданий эс алуу үчүн аянтчалар түзүлгөн.

Эске салсак, шаар тургундарын электр энергиясы менен камсыздоо кызматы учурда 1967-жылы курулган имаратта иш жүргүзүп келет.