Бишкек, 07.06.24. /Кабар/. Ошто түнкү клубда баңгизат сатуу каналына бөгөт коюлду. Бул тууралуу Улуттук коопсуздук мамлекеттик комитетинен билдиришти.
УКМК Ички иштер министрлигинин түштүк аймагы боюнча Баңгизаттарды мыйзамсыз жүгүртүүгө каршы күрөшүү кызматы менен биргеликте баңги заттарын мыйзамсыз жүгүртүүгө каршы күрөшүүнүн алкагында Ош шаарында жайгашкан "Прада" түнкү клубунда наркотикалык заттарды мыйзамсыз жүгүртүү каналын аныктады.
Тактап айтканда, ыкчам-издөө иш-чараларынын жүрүшүндө түнкү клубда күзөт кызматкери болуп иштеген 2004-жылы туулган КР жараны И.у.Б. гашиш жана спайс сыяктуу баңги заттарын сатуу менен алектенип жүргөндүгү такталды. Ошондой эле И.у.Б.нын 2005-жылы туулган Б.у.А. аттуу шериги аныкталып, ал официант болуп иштеп, түнкү клубда баңгизат сатуу менен алектенген.
Жүргүзүлгөн комплекстүү ыкчам-издөө иш-чараларынын натыйжасында 2024-жылдын 31-майында "Прада" түнкү клубунун жанынан И.у.Б., ал эми 2024-жылдын 2-июнунда Ош шаарынан Б.у.А. кармалды. Кармалгандар Юстиция министрлигине караштуу Ош шаарындагы № 25 мекемеге киргизилди.
Азыркы учурда УКМК жана ИИМдин Баңгизаттарды мыйзамсыз жүгүртүүгө каршы күрөшүү кызматы биргелешкен пландын алкагында аталган наркоканалга тиешеси бар башка адамдардын кылмыш иштери тууралуу маалыматтарды чогултууга жана документтештирүүгө багытталган тергөө жана ыкчам-издөө иш-чараларын улантууда.
Пикир
Оставить комментарий