Бишкек, 10.04.20. /Кабар/. Ошто өзгөчө абал киргенден бери 12 миң 700 өткөрмө кагазы берилди. Бул тууралуу Ош шаарынын, Кара-Суу жана Ноокат районунун коменданты Малик Нурдинов билдирди.
Анын айтымында, өткөрмө кагаздардын 7 миң 555и жөө жүргүнчүлөргө берилген. "Жөө жүргүнчүлөрдүн ичинен 2 миңи медкызматкерлер, 1 миң 800ү банк кызматкерлерди түзөт.
Ошондой эле мамкызматкерлерге, коммуналдык кызматта иштегендерге берилди.
Нурдинов кошумчалагандай, уруксат кагазы 5 миңге жакыны автоунаа ээлерине берилди. Түнү менен жүргөн уруксат кагазы 600 адамда бар.
10-апрелге карата Кыргызстанда коронавирусту жуктуруп алгандардын саны 298ге жетти. Алардын ичинен 39у дарыгер. Коронавирустан 39 жаран айыкса, ооруну жугузуп алган 5 адам каза болду.
Коронавируска байланыштуу Кыргызстандын Бишкек, Ош, Жалал-Абад шаары, Ноокат жана Кара-Суу, Сузак райондорунда 2020-жылдын 25-мартынан саат 08.00дөн баштап 15-апрелине саат 08.00гө чейин өзгөчө абал киргизилген.
Мындан улам өзгөчө абал киргизилген шаар жана райондордо 20:00-07:00 сааттар арасы коменданттык саат деп белгиленип, ал убакта көчөдө жүрүүгө тыюу салынды. Ал эми саат 07:00дөн 20:00гө чейин жарандар сыртка үч себеп менен чыга алышат: дүкөндөн азык-түлүк, дарыканадан дары-дармек сатып алуу жана ооруканага баруу үчүн. Сыртка чыкканда жарандардын жанында өздүгүн тастыктоочу документи жана маршруттук кагазы болуш керек.
Пикир
Оставить комментарий