Бишкек, 27.08.19. /Кабар/. 2019-жылдын 7 айында "РСК Банк" ААК тарабынан жалпы 4 млрд 784 млн 982 миң 116 сомго 7 миң насыя берилген. Бул тууралуу "Кабар" агенттигиндеги маалымат жыйында "РСК Банк" ААК башкармалыгынын төрагасы Азизбек Оморкулов билдирди.
Анын айтымында, 7 миң насыянын 766сы борбордо берилсе, калганы аймактарга берилген.
"2017-жылга салыштырмалуу 2018-жылы аймактарды каржылоо 21%га өскөн. 2019-жылы бул көрсөткүч артууда. Банк тарабынан облустук бизнес долбоорлорду өнүктүрүүгө багытталган өзүнчө продукттар түзүлүүдө. Эң көп насыя Жалал-Абад облусунда – 1 миң 452, андан кийин Ош облусунда – 1 миң 37 насыя берилген", - деди Оморкулов.
Ал, 2019-жылы банктын адистери "Аймак", "Келишим" жана "Өнүгүү" өңдүү жеңилдетилген продукттарды иштеп чыгышканын белгилеп өттү.
Пикир
Оставить комментарий