Өзгөндө Салык кызматынын бөлүм башчысы 200 миң сом пара менен кармалды (видео)

Бишкек, 21.12.23. /Кабар/. Мамлекеттик салык кызматынын райондук башкармалыгынын бөлүм башчысы опузалап пара алганда кармалды, деп билдирет Ички иштер министрлигинин басма сөз кызматы.

Маалыматка ылайык, ИИМдин Кылмыш иликтөө башкы башкармалыгынын төртүнчү башкармалыгынын кызматкерлери салык чөйрөсүндөгү коррупциялык көрүнүштөрдүн фактыларын аныктады. Чогултулган материалдардын негизинде КР Кылмыш-жаза кодексинин 343-беренеси (Опузалап пара алуу) боюнча кылмыш иши козголгон.

Алынган маалыматка ылайык, Мамлекеттик салык кызматынын Ош облусунун Өзгөн району боюнча башкармалыгынын кызматкери салык текшерүүсүнүн жыйынтыгын бурмалоо жана 700 миң сомдон ашык салык карызын жашыруу үчүн облустун тургунунан акча талап кылган. Салык кызматынын кызматкери пара катары 200 миң сом акча талап кылган.

Кылмыш иши боюнча тергөө-ыкчам иш-чаралар жүргүзүлүп, 2023-жылдын 20-декабрында 200 миң сом суммасындагы акча каражатын алып жатканда Мамлекеттик салык кызматынын Өзгөн району боюнча башкармалыгынын бөлүм башчысы У. К. кармалган.

Тинтүү иштеринин жүрүшүндө күрмөнүн чөнтөгүнөн пара катары алынган акчалар табылган.

Кылмыш ишинин алкагында ыкчам-тергөө иш-чараларын ИИМдин КИББдин төртүнчү башкармалыгынын кызматкерлери жүргүзүштү.

Кармалган жаран убактылуу кармоочу жайга киргизилип, тергөө иштери жүрүп жатат.