Тамак-аш продукциясынын коопсуздугун камсыздоого багытталган мыйзам долбоору демилгеленди

Бишкек, 18.11.24. /Кабар/. Бүгүн Жогорку Кеңештин Социалдык саясат боюнча комитетинин жыйынында «КР тамак-аш продукциясынын коопсуздугун камсыз кылуу жөнүндө», «КР Укук бузуулар жөнүндө кодексине өзгөртүүлөрдү киргизүү тууралуу» мыйзам долбоорлору биринчи окууда каралды.

Мыйзам долбоору Жогорку Кеңештин депутаттары Марлен Маматалиев, Эрулан Кокулов, Медербек Алиев, Нурбек Сыдыгалиев, Винера Раимбачаева, Айсаракан Абдибаева, Айбек Маткеримов, Бакыт Тентишев, Балбак Түлөбаев, Аида Исатбек кызы, Лейла Лурова, Шарапаткан Мажитова, Талант Мамытов, Мурадил Сыдыков, Эмиль Токтошев, Алишер Козуев тарабынан демилгеленген.

Мыйзам долбоорун демилгечилердин бири, комитет төрайымы Винера Раимбачаева тааныштырды. Анын айтымында, мыйзам долбоорлору Кыргызстан калкынын арасында топтук жугуштуу ооруларды, тамак-аштан массалык түрдө ууланууларды же саламаттыкка башка олуттуу зыян келтирүүнү болтурбоо максатында аталган тамак-аш азыктарын же чийки тамак-аш затын өндүрүү, жүгүртүү жана сатууда соода-сатык жана коомдук тамактануу жайларында санитардык-эпидемиологиялык ченемдер менен техникалык регламенттердин эрежелеринин талаптарын бузгандарга карата мыйзамдуу чараларды күчөтүүгө багытталган.

«Укук бузуулар жөнүндө кодексинин колдонуудагы ченемдерине ылайык, санитардык талаптарды бузгандыгы үчүн жеке жактарга 1000 сом, юридикалык жактарга 5000 сомго чейин айып пул салуу жаза чараларын көрүү каралган. Бирок, практика жүзүндө салынган айып пулдардын суммасы ишкерлер жана майрамдык иш-чараларды уюштургандар үчүн таасир этүүчү чара болуп саналбайт», - деген Винера Раимбачаева мыйзам долбоорлору менен жеке жактарга 50 миң сом, ал эми юридикалык жактарга 100 миң сом өлчөмүндө айып пул салуу сунушталып жатканын кошумчалады.

Муну менен катар баяндамачы тамак-аштан массалык уулануу боюнча эпидемиологиялык абал жыл сайын курчуп бара жатканын айтып, 2023-жыл ичинде 212 бактериялуу тамак-аштан уулануу катталып, 590 кишинин жабыркоосуна жана 5 өлүмгө алып келгенин белгиледи.

Жыйынтыгында мыйзам долбоорлору биринчи окууда колдоо тапты.