Бишкек, 12.09.24. /Кабар/. Бишкектеги мамлекеттик Тарых музейинде көрүнүктүү мамлекеттик жана коомдук ишмер, КР Баатыры Апас Жумагуловдун 90 жылдыгына арналган илимий-практикалык конференция өтүүдө.
Мамлекет жана укук институтунун директору, саясат илимдеринин доктору Токон Мамытовдун айтымында, бул конференция өзгөчө жаш муун үчүн чоң мааниге ээ.
"Биз ким экенибизди жана кайдан келгенибизди эч качан унутпашыбыз керек. Азыркы кыргыз мамлекеттүүлүгүнүн калыптанышына жана өнүгүшүнө зор салым кошкон көрүнүктүү мамлекеттик ишмерлерибизди дайыма эстей жүрүшүбүз шарт. Алардын арасында Апас Жумагулов да бар. Алар патриоттук духту, Мекенди сүйүүнү, сабырдуулукту, билимге умтулууну, эмгекчилдикти тарбиялоодо чоң мааниге ээ. Апас Жумагуловдун өмүр жолу өсүп келе жаткан муун үчүн негиз болуп кызмат кылат", - деди ал.
Токон Мамытов белгилегендей, Апас Жумагулов Кыргызстандын өкмөтүн үч жолу жетектеген. Көптөр анын өкмөттү эки жолу башкарганын айтышат, бирок документтер анын Кыргызстандын өкмөтүн үч жолу, 1986-1991-жылдары, 1993-1995-жылдары жетектеп, 1995-жылы референдумда анын талапкерлиги кайрадан жактырылып, 1995-1998-жылдары үчүнчү жолу премьер-министр болгонун тастыктайт.
"Ал Кыргыз Республикасынын социалдык-экономикалык өнүгүүсүн өнүктүрүүгө, коргонууну жана коопсуздукту чыңдоого чоң салым кошкон. 1989-жылы тарыхта биринчи жолу Тажикстандын премьер-министри менен кыргыз-тажик мамлекеттик чек арасы боюнча макулдашууга жетишкен. Эми кийинки бардык сүйлөшүүлөр ушул келишимге негизделет. Ал экономикалык гана эмес, коопсуздук жана чек ара маселелерин да өнүктүрүүгө салым кошкон", - деп сөзүн жыйынтыктады Мамытов.
Пикир
Оставить комментарий