Бишкек, 18.05.23. /Кабар/. "Каракол" аэропортунун жетекчилиги ишенип берилген каражатты максатсыз пайдаланган. Бул тууралуу Улуттук коопсуздук мамлекеттик комитетинин басма сөз кызматынан билдиришти.
Маалыматка ылайык, УКМКнын Ысык-Көл облусу боюнча башкармалыгы тарабынан "Каракол" аэропортунун жетекчилигине карата КР Кылмыш-жаза кодексинин 210-беренеси (Ишенип берилген мүлктү ыйгарып алуу же коротуу) боюнча кылмыш иши козголуп, тергөө амалдары жүрүп жатат.
Жүргүзүлгөн ыкчам-издөө иш-чараларынын жүрүшүндө "Каракол" аэропортунун кызмат адамдары жеке кызыкчылыгын көздөп, аэропорттун атайын техникасын жана жабдууларын, баалуу металлдарды чыгарып алган адамдарга мыйзамсыз сатып жибергендиги аныкталган.
Ошентип, көрүлгөн чаралардын жана уруксат берилген издөөлөрдүн жыйынтыгы боюнча Каракол шаарында алтынды аффинаждоочу жер астындагы лаборатория табылган, кийин ал тиешелүү профилдеги экспертизанын корутундусу менен тастыкталган.
Учурда бул иш боюнча тергөө иштери уланууда.
Пикир
Оставить комментарий