Бишкек, 18.09.19. /Кабар/. ЕККУнун Варшавада өткөн адам укуктары боюнча жыйыны тажик өкмөт мүчөлөрү менен бозгундагы оппозиционерлердин пикир алмашуусу үчүн негизги аянтча болду.
Жыйындын биринчи күнүндө Тажикстан президентинин жардамчысы Зариф Ализода өлкө адам укуктары тармагында мыйзам базасын бекемдеп, БУУнун бул багыттагы документтерин ратификациялаганын айтты.
Андан эки сааттан кийин сөз алган Тажикстандын «Эркин ой жүгүртүүчүлөр» форумунун өкүлү, Польшада жашаган Махмуджон Файзрахмон адам укуктарын камсыздоо боюнча тажик дипломаттары жана расмий өкүлдөрүнүн маалыматтары чындыкка дал келбей турганын билдирди.
«Тажикстан – активисттер жана жөнөкөй жарандар социалдык түйүндөрдө «лайк» баскандан корккон өлкө», – деп белгиледи ал. Активист Тажикстанда тыюу салынган «Ислам кайра жаралуу партиясынын» башчысы Мухиддин Кабиринин интервьюсун көрүп, аны өз баракчасында жарыялаганы үчүн былтыр май айында 9,5 жылга соттолгон Алижан Шариповдун ишин эске салды. Сот аны «экстремизм жана конституциялык түзүмдү күч менен өзгөртүү чакырыгы» боюнча күнөөлүү деп тапкан.
ЕККУ жыйынында сөз сүйлөгөн тажик оппозиционерлери соңку кездерде Тажикстанда көз карандысыз басылмаларды куугунтуктоо, журналисттердин «оозун басуу» аракети күчөп жатканына токтолушту.
ЕККУ Тажикстанды бир нече жолу адам укуктарын жакшыртууга, анын ичинде сөз эркиндигин сактап, журналисттердин иштөөсүнө шарт түзүүгө чакырган.
2016-жылы Тажикстандын өкмөттүк делегациясы ЕККУ жыйынына тажик оппозициясынын өкүлдөрү катышканына нааразылык билдирип, залдан чыгып кетишкен. Арадан жарым жыл өткөндөн кийин бул уюмдун Тажикстандагы макамы төмөндөтүлгөн. Анда тажик бийлиги ЕККУну «террорчуларга» трибуна берди деп айыптаган. Өз кезегинде уюм Варшавадагы жыйын бардык саясий топтордун өкүлдөрү үчүн маанилүү аянтча экенин билдирген.
Пикир
Оставить комментарий